Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Vanden grave van Brusele ende van Lovene.

Dat III Capittel.

Lambrecht, Heinrics des ouden sone,
Daer ic vore af seide die gone,
Maecte, dat horen wi lesen ende lien,
Twee harde scone canisien:
Dene was te Brusele, als men siet,
Dat sinte Michiels borch hiet,
Dat nu heet sente Gudulen kerke:
Daer sette hi papen ende clerke;
Ende te sinte Peters te Lovene mede
Maecti ene canisie ter stede.
Hem bleef een sone, die Heinric hiet,
Dien hi Lovene ende Brusele liet:
Dese Heinric, heb ic verstaen,
Hilt enen edelen man ghevaen,
Die Herman was gheheten.
Die croniken doen ons weten
Dat dese Herman jamerlike
Vermoerde desen Heinrike,
Nachts, daer hi lach en sliep,
Ende alsoe sijnre straten liep.
Dese Heinric, die dus is versleghen,
Liet enen sone, enen deghen,
Die Heinric hiet na den vader,
Dien hi sijn lant liet al gader:
Dese ander Heinric liet
Enen anderen, die oec Heinric hiet,
Die bi Dorneke bleef verslaghen,
Ende wart te Nivele ghedraghen.
Enen sone liet hi van groter waerde,
Ende hiet Godevaert metten baerde,
Die grave bleef ins vaders stede
Van Lovene ende van Brusele mede,
Die weder al sijn gheslachte
Ter eren hief ende brachte;
Want hi Lothrike vercreech met allen,
Dat sinen vorders was ontfallen.
Daer wart hi toe verheven scone,
Sonder ter conincliker crone,
Daer sijn si noch ute versteken
Bi Hughen Capets valschen treken.
Hoe metten baerde, dese vrome man,
Den name van Lothrike wan,
Ende hoes die Ardenoise worden quite,
Diet langhe hilden met vlite,
Sal ic u hier na segghen saen;
Maer ic sal eerst doen verstaen,
Hoe ic best can, ende cont doen
Godevaerts vaert van Bolioen;
Want si was recht in dien tiden
Die wi hier vore overliden;
Ende want hi van desen heren quam
Van rechten ore, als ict vernam,
Soe staet hi hier te rechte wale;
Want sijn oudemoeder tien male,
Die bi namen hiet Machtelt,
Was dochter, voer waer ghetelt,
Heinrijcs des ouden van Brusele grave,
Als ic u vore seide daer ave.
Die heilighe vaert sal ic u
In corten woerden segghen nu,
Hoe si began ende hoe si inde,
Alsoe als ict bescreven vende;
In gherechter waerheiden
Sal ict u nu segghen ter stede.