Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Tweede boek.

Die ander boec hier beghint.
Die u sal maken bekent
Den anderen staet van den heren.
Hoe dat si in groter eeren,
Twee hondert ende veertich jaer,
Twe min, weet voerwaer,
Coninge saten geweldelike,
Somme keiseren des gelike,
Ende hoe dat si vielen weder
Bi verradenissen neder,
Ende der cronen worden quite,
Die si hielden dus met vlite.
Mar die minne in alre wise
Van Amelise ende Amise
Sal ic u vertrecken voren,
Om dat si eens deels behoren
Ter geesten, die hier volget na,
Alsoe als ict beste versta,
Hoe si hem onderminden
Ende hoe hoer saken einden.
Dit boeck houdt in, tsinen dele,
Drie ende tsestich capitele.