Sommighe Daghelicsche Ghebeden
(1595)–Pieter de Bisschop–
Auteursrechtvrij
[Folio A7r]
| |
Op de wijse des lxxxix. Psal.
O God v loven wy, ghy zijt een Heere goet,
O eeuwich Vader, dij tgantsch’ Eerdtrijc eer aendoet
Desghelijcx doen ooc al dijn’ Enghelen verheven
Den Hemel end’ ooc al d’Enghelen sterc: daerneven
Den Enghel Cherubin end’ Seraphin dij eeren
Roepende met luyder stemme zonder cesseren:
Heylich, Heylich, Heylich: HEERE God Sebaoth,
Hemel end’ Aerde zijn vervult: O Heere God
Met heerlicheyt dijns lofs: de lievelicke schare
Dijner Apostelen bekennen allegare
V voor een ware God glorieus onghemeten:
Sulcx doen ooc tgantsch ghetal dijner heylgher Propheten.
Ooc alle Martelaers verkondighen ghewis
V groote heerlicheyt, door haer belijdenis:
Ooc d’wtvercoren al, loven dy t’aller stonde
Inden gantschen Omloop des Eerderijcx int ronde
Eenen Vader te zijn oneyndelic in krachten,
Van hoogher Majesteyt, end’ alderstercst van machten.
Dijnen eenighen Soon Jesum Christum zeer fijn
Bekennen sy met v een ware God te zijn,
Ooc dijnen heylghen Gheest eenen Trooster zeer krachtich,
O ghy Heere Christe, ghy zijt bekent warachtich
Voor een Coninc des lofs, ghy zijt een eewich Sone
Dyns Vaders almachtich, ghedaelt wt tshemels Throone.
V Vleesch der Maghet eerbaer en hebt ghy niet veracht
Aen te nemen wt haer, om t Menschelic gheslacht,
Daer door te verlossen, die zalich wesen zouden.
Ghy hebt O Heer den strijt des bittren doots behouden,
Ende daer door uwen heylighen Bondtghenoten
Themelrijc gheopent, twelc voor hen was ghesloten.
Daerom zit ghy nu Heer, aen Godes rechter hant
Tot dijnes Vaders eer’, heerlic end’ triumphant.
Hier na zult ghy weder verschijnen inde wolcken,
Een rechtveerdich Richter t’oordeelen alle volcken.
O Heer wy bidden dij helpt v Dienaers ten goede,
Die ghy verlost hebt met uwen dierbaren bloede.
Maect deelachtich dijns lofs v vrienden al te zaem,
Met uwen heylghen al, die prijsen uwen Naem:
| |
[Folio A7v]
| |
O Heere helpt v Volc, dat ghy hebt wtverkoren
End’ zeghentse die dij ter Erve toebehooren
Richtse ghy end’ leert hen voort aen met lof end’ eere
Altijt uwen heylghen wille te doen o Heere.
WY loven dijnen naem O Heer ghebenedijt
Bewaert ons al te saem, nu end’ tot aller tijt
Dat wy niet en vallen in zonden end’ misdaden
O Heer onser ontfermt, end’ neemt ons in ghenaden:
O Heere helpt ons ghy, want wy op v betrouwen
Ons hope staet op dij, helpt ons HEER wt benouwen.
|
|