Seer scoon ende suyver boeck, verclarende die mogentheyt Gods, ende Christus ghenade, over die sondighe menschen

[p. 242]

 

Tsacrament is veracht / tot onser schanden / groot

 

Also treckt Gods cracht uut onsen tanden / dbroot.

Refereyn.

STaet op ghy droomers / sult ghy noch lange sluymen
Int bedde der wellusticheyt u strecken / nu:
Al duncket u saechte / tzijn seer bange pluymen
Tis meer dan tijt / wilt metten gange tuymen
Uut dlant / van Egipten / wilt vertrecken / nu
En mueghen die plagen niet ontwecken / u
So en slaept ghy niet / maer sijt heel en al doot
En sullen niet buygen / u herte necken / nu:
Duer tverdriet dat swaer is in tghetal groot
De schueren zijn ydel / van vruchten tdal bloot
Wy en mochten / in geen quader perket / steken
De beesten lijden van honger inden stal noot
De schepen hebben duer tempeest gheschal // stoot
God sal zijn onwere / over ons noch / bet wreken
Want wy hem versmaden / en zijn wet breken
Duer ons sonden swaer
Wilt u schult zijdy met sonden besmet / spreken
Met dit nieuwe / Jaer.

Dat wy de plagen / willich van Gods hant namen
Jae dat wy ons meer / te lijden schuldich / kinden
Waren gebonden met der liefden / bant / tsamen
Metter kercken / over een in tverstant / camen
Der heyliger schrift / en God ghehuldich / minden
Hy soude ons voorspoet / menichfuldich / sinden
Neeringe / coren / alle vruchten / wijn
Wy souden dus nootdruft overtuldich / vinden
Alle natien souden / voor ons vluchten / fijn
Christenrijck sou tParadijs / van genochten sijn
Gheringe sonden tribulatien / swichten
Ten souden gheen pesten / oft quade luchten / zijn
Van oorlogen en souden gheen geruchten zijn
God sou ons so met zijnder gratien lichten
Dat wy souden de vremde natien stichten
Met leven exemplaer
Schiet tot God der vieriger oratien schichten
Met dit nieuwe / Jaer.

[p. 243]

 

Met vreesen beven / wildt u salicheyt wercken

 

Naer Gods woort neerstich / en appetijtich / hoort

 

Door goddiensticheyt / u liefgetalicheyt stercken

 

Laet alle menschen / u liberalicheyt mercken

 

Der sancten / voetstappen / twert u profijtich / spoort

 

Staet opten ouden wech gaet daer in vlijtich voort

 

Gheen vremde leere / uut nieugiericheyt / smaken

 

Uut uwen mont en gae geen quaet / oft spijtich / woort

 

Wildt naer gheen eertsch goet / uut giericheyt / haken

 

Laet in u geen onreyn ondiericheydt blaken

 

Onreyn gedachten / uut u memorie jaecht

 

Wilt vasten / en bidden / met viericheydt / waken

 

Soo sal u haest Gods goedertiericheydt / naken

 

Suyver en reyn / uus herten cyborie / draecht

 

U lijf eest noodt / tot Gods glorie / waecht

 

Hebt ghy lijden eenpaer

 

Dat voor de hoochste consistorie / claecht

 

Met dit nieuwe Jaer.

 

 

 

Werdt vernieut inden geest / door een goet / leven

 

Sijdt niet meer hooveerdich / straf / oft stuer / doch

 

U gaven / wilt uut eenen vrijen moet / gheven

 

Schoudt ambitieusheyt dier veele doet / sneven

 

Weest medelijdende / met uwen bruer / och

 

Vertroost de geene / die zijn in ghetruer / noch

 

Begheerten des vleesch / die tegen den geest / strijen

 

Werpt van u suycht / uut Gods woort / suyver puer soch

 

Wilt alle oncuyscheydt minst en meest / mijen

 

Alle tribulatie / onghevreest / lijen

 

Niet met alle winden / als een riet waeyen

 

Wilt vremde / opinien / uut uus hertenkeest / snijen

 

De heere salse van alle tempeest / vryen

 

Die hier in tranen / sonder verdriet / sayen

 

Maer die niet en saeydt / en sal oock niet / maeyen

 

In dleven hier naer

 

Dus doende / muecht ghy Gods gramschap yet / paeyen

 

Met dit nieuwe / Jaer.

[p. 244]

 

Wilt voor den throon der genaden / terstont cloppen

 

Ghy die van God gheschepen / soe eedelijck / zijt

 

Worpt uut den ouden deesem / de vuyl gront soppen

 

Dat ghy den quaetsprekers / muecht den mont stoppen

 

In al u conversatie redelijck / zijt

 

De wercken des vleesch / gans vertredelijck / zijt

 

Naer u misdaet / u tot penitencie voecht

 

Maer altijt / in uwen dienst redelijck / zijt

 

Als u yet / in uwer conscientien / wroecht

 

Twaer noodt dat ghijse / met displicentien / dwoecht

 

U schult belijden / met heeten tranen / oock

 

Dooghen ten hemel / met reverentien / sloecht

 

Den acker uus vleesch / met abstinentien ploecht

 

Doet uut den ouden mensch / naer Paulus vermanen / ooc

 

Strijt eenen goeden strijdt / zijt cloec ter banen oock

 

Neempt den tijt wel waer

 

Doet ghy dus / God sal u sonden uut planen / oock

 

Met dit nieuwe Jaer.

 

 

 

Prince die niemandt / en mach wederstaen

 

Die macht / in hemel en onder der sonnen / hebt

 

U minlijcke ooghen / wilt neder / slaen

 

Siet onsen noot / o hoochste bevreder / aen

 

Ghy die den ouden draeck / verwonnen / hebt

 

Lust hebbende / tot ons ghy dwerck begonnen / hebt

 

U lieffte / den vader die op ons was gram / booch

 

Maecte pays / duer dbloet / dat ghy uutgeronnen / hebt

 

Besneden zijnde / reyn godlijck lam / hooch

 

Liefde u in dmaechdelijck buycxken lofsam / tooch

 

Laet ons nu singhen / met onsloten kelen

 

Tot ons den Arent die eerst wilt was tam vlooch

 

Van nijde den Draeck vier en vlam / spooch

 

Aensiet ons herten / met listen doorschoten / quelen

 

Al eest dat die uut ketters tronck / zijn ghesproten stelen

 

Veere hier en daer

 

Nieu plantkens der deuchten / hopen wy poten / selen

 

Met dit nieuwe Jaer.

[p. 245]

CONCLUSIE.

Aendachtelijck	Aenroept God met gebogen / knien
Neerstelijck	Naer Bethleem / met vaster hopen / gaet
Nu wy de plagen	Noch voor oogen / sien
Aenmerct Christus / bloet	Als heden ghedropen / jaet.
Beminde	Broeders al hebt ghy gesopen / quaet
Infect venijn	In ketterijen verslonden / laecht
Jesus genade	In desen tijdt / open staet
Niet wanhopende	Nu hem u wonden / claecht
Soect het	Soet lam / Gods dat der werelt sonden / draecht

Meer suers dan soets.