Seer scoon ende suyver boeck, verclarende die mogentheyt Gods, ende Christus ghenade, over die sondighe menschen
(2007)–Anna Bijns–
Auteursrechtelijk beschermd
[pagina 237]
| |
Refereyn.ONtspringt uuten slape godvruchtighe sinnen
Die Dapostelsche kercke / u moeder kinnen
Heft op u stimmen
Metten Cherubinnen en Seraphinnen
Met alle Inghelen wilt Gods lof beghinnen
Laet de ketters grimmen
Priesters wilt inden tempel des heeren climmen
En wilt de slapende gemeynte / ontwecken
Die met Petrus scheepken in perijckel swimmen
Hoe de spotters gecken
Die door haer leere / tvolck uuten tempel trecken
Daerse tot Gods lof mochten worden beweecht
Al rueren si haer fenijnighe becken
Doet ghy / so ghy pleecht
Naer Christen costuyme / wee u waert dat ghy sweecht
Laet orghelen spelen laet clocken clincken
Doet keersen ontsteken twaer quaet dat ghijt steecht
Daer de menschen mede / haer scheppers ghedincken
Wilt God offerhande uwer lippen schincken
Gheestelijcke menschen / in elck contreye
Loeft den heere / met desen soeten Meye.
Singt de seven getijden / in spijt der kettersGa naar voetnoot47
Vervalschers van Gods woort / si en doen niet netters
Dan Gods lof ontraeyen
En wilt niet hooren / na der beelden afsetters
Kerckbrekers duecht / en vreucht beletters
Acht niet haer kraeyen
Singt salve loeft / de moeder der ghenaeyen
Die onsen verlosser heeft ter weerelt bracht
En in de moeder wilt ghy den vader paeyen
Loeft haer salige dracht
Oock den heyligen geest door wiens godlicke cracht
Maecht wert moeder / wilt te mettentije waken
In gheestelijcken lovesanck / dach en nacht
Therte blije maken
Maer schout de sangen / die ketterije smaken
Die als nu in veel landen werden geuseert
Naer puren lofsanck / wilt ghy clergie haken
Daer toe zijt ghy spetialijck gheordoneert
Als broeders eendrachtelijck niet en discoordeert
Gheestelic en weerlijck so ick eerst seye
Loeft den heere / met desen soeten meye.
| |
[pagina 238]
| |
Bisschoppen Prelaten groote cadetten
Heeren en vorsten al die sitten in wetten
Als dienaers des heeren
Laet loven den heere / met trompetten
Laet clincken schalmeyen en claretten
Al tot zijnder eeren
Wilt met Chimbalen zijnen lof vermeeren
Wilt gheen tamboeren oft herpen sparen
Om den heere te loven / naer Davids / leeren
Laet clincken de snaren
O Orphee wilt alle beesten vergaren
Die ligghen gedoken / in bosschen in duynen
Alle vogelkens / wilt u hier by oock paren
Op boomen op tuynen
Heft op stemmen wilt niet vesen oft tuynen
Loeft den heere elck in sijnder talen
Datment mach hooren op bergen in dalen
Dat Gods lof mach vermeeren in alle palen
En zijn eere die schier te niete zijn beye
Loeft den heere / met desen soeten Meye.
Loeft God tis recht ghy redelijcke gheesten
Daer Davidt seyt loeft den heere alle beesten
Tsy van wat manieren
Voghelen des hemels minste metten meesten
Beesten der aerden wint hagel en tempeesten
Wilt Gods lof verchieren
Locht / wolcken / Zee / wateren / alle Rivieren
Oock alle visschen / die daer in blijcken
Met alle dinstrumenten diemen mach hantieren
Van soeter musijcken
Loeft den heere met woorden van rethorijcken
Loeft den heere maechden en Jonghelinghen
Loeft den heere berghen hovelen / en dijcken
Fonteynkens die springhen
Loeft hem sienlijcke / en onsienlijcke dinghen
Wateren die boven die hemelen duycken
Met al den lof diemen mach verstringhen
Loeft hem al dat is in sweerelts beluyken
Loeft hem alle cruydekens groene struyken
Vruchtbaer landouwe en dorre heye
Loeft den heere met desen soeten meye.
| |
[pagina 239]
| |
Loeft den heere ghy hemelen en tfirmament
Sonne en mane / alle planeten / jent
Reghen en Dau
Met alle den sterren / den Hemel ontrent
Werdt in Gods lof die hem te loven zijt gewent
Niet traghe oft flau
Loeft hem alle aertrijck drooghe en grau
Oock alle beemden lustich en groene
En oock alle bloemkens ghelu peersch blau
Nu in saysoene
Loeft hem dach en nacht / avont en noene
Al dat inden hemel is oft daer ondere
Loeft den Heere / van alle zijn crachten coene
Die wercken wondere
Loeft den heere / altsamen / en elck bysondere
Dat leven ontfaen heeft in steden ghehuchten
Loeft den Heere blixem / en dondere
Boomen ghebladert / bloemen / en vruchten
Met volhertelijcker / blijschap / sonder duchten
Met yochen met singhen met soeten ghescreye
Loeft den Heere met desen soeten meye.
Metten soeten Meye / wilt den Heere loven
Nu als de veldekens / prielen en hoven
Gheven soeten goor
Maer en blijft opte creatueren niet verschoven
Door hen leerdt minnen den schepper hier / boven
Die zijn tresoor
Der genaden ontsluyt / tdoedt al zijn devoor
Tot solaes der menschen groyen bloemen / en cruyt
De vogelkens soetelijck houden haren choor
Singhende overluydt
O Christen ziele / weest dancbaer met soo ruydt
Wildt u inwendighe ooghen ontsluyten
Gaedt uwen Bruydegom metter minnender / bruyt
Soecken daer buyten
Scheppers schoonheydt / merct inde bloemkens die spruyten
Aurora schinckt / ons even ghedichte
Den soeten Dau / uut shemels conduyten
Die tgarseken doet groyen metter sonnen lichte
Die soeticheyt des tijdts verblijdt elck ghesichte
Ghy die int tveldt doedt u vespereye
Loeft den Heere met desen soeten meye.
| |
[pagina 240]
| |
Prince.
Christelijcke Princen Coningen der eerden
Wilt nu de oorloghe des heeren aenveerden
Catholijcke Vorsten
Om Gods lof te vermeeren scherpt u sweerden
En straft de ghene / spaert Harnas oft peerden
Die Gods lof op schorsten
Die hebben gesoghen der kercken borsten
En nu haer eyghen moeder verschueren
Naer der Catholijcker bloet oock dorsten
Met valsche errueren
Donnoosel verleyen / maer laet ons niet trueren
Waer is Arrius? met meer secten vinderen
Van God gheplaecht ten sal niet beter ghebueren
Dees duyvels kinderen
Die in alle Landen Gods lof verminderen
Aen de ghewijde vaten / haer handen / steken
Diet als grijpende Wolven / al verslinderen
Maer schaepkens vreest niet God sal haer tanden breken
Hy sal de kercke van haer vyanden / wreken
Al lieten de Princen tsweert / steken in scheye
Loeft den Heere met desen soeten Meye.
| |
[pagina 241]
| |
Conclusie.
Als ghy de sonne siet blincken inden throone
Noch als de velden becleet met groene / nu
Neerstelijck merct dat de vruchten staen schoone
Altijt loeft den Heere / avont en noene / nu.
Bidt hem want tis grootelijc van doene / nu
Innichlijck dat hy wil sinen gheest / sinden
In alle prelaten en Princen coene / nu
Niet en twijfelt hoe seere wy ons bevreest / vinden
Soe doende / sal lichtelijck al dit tempeest inden.
Meer suers dan soets. |
|