Seer scoon ende suyver boeck, verclarende die mogentheyt Gods, ende Christus ghenade, over die sondighe menschen

[p. 190]

Refereyn.

O Doot door u memorie ick vereyse
Weer ic voorwaert gae oft achterwaert deyse
Ick en mach u niet ontvlien / dit doet my beven
Ick moet wech ic en weet waer leyt de reyse
Weer ter hellen / oft ten hemelschen paleyse
Maer tis seker al dat ontfaen heeft leven
Moet sterven tvonnis is so ghegeven
Hier tegen en is oock gheen appellatie
Mijn dagen zijn getelt / mijn jaren sijn geschreven
Alle uren werde ick ter doot ghedreven
Ick en weet hoe oft waer tijt oft spatie
Mijn sonden sijn vele sonder comparatie
En svyants tentatie sal my dan bevechten
Dus mach ick arm sondaer wel roepen om gratie
Want sou my God / naer mijn verdiensten rechten
Ick werde ghelevert den helschen knechten
O bermhertige Jesu / dus roepe ick dy aen
Heere alst my al afgaet wilt my dan bystaen.

Als sieckte my quelt / niet om verstrangen
Als den neuse scherpt / en de blosende wangen
Verbleecken / de lipkens bestaen te blauwene
Alsmen roept om biechte / alsmen tcruys gaet langen
Als diveersche pijnen / mijn lichaem prangen
En als den pols beghint te flauwene
Als treeusweet hem pijnt door tvel te dauwene
Tvleesch nae trotten walgelijck te stinckene
Als de huyt / eertachtich / begint te grauwene
En therte / van uren / tot uren / begint te nauwene
Alsmer gaet couten van graven van sinckene
En mijn vrienden / om tgelt / bestaen te dinckene
Die meer mijn goet / dan mijn leven begheeren
Alsmen Gods lichaem my brengt met clinckene
En alsmen de leden gaet Olijen / en smeeren
Als mijn maghe gheen spijse / en can verteeren
O Christe Jesu wilt u ooghen op my slaen
Heer alst my al afgaet wilt my dan by // staen.

[p. 191]

 

Als memorie faelgeert / de crachten beswijcken

 

En der doot voorboden / openbaerlijck blijcken

 

Als mijn magen die naer my / mijn goet sullen erven

 

Mijns niet en achten / maer na plonderen kijcken

 

Als de dootlijcke nopen / ter herten waert strijcken

 

En de leden vaste allenskens sterven

 

Als ick allen eertschen troost moet derven

 

En alleene moet comen voor Gods presentie

 

Rekeninghe doen / en den kerf af kerven

 

Wat ic misdaen hebbe / waer en hoe menich werven

 

Ende als mijn arm beladen conscientie

 

Van cleynen ghebreken / maect groote mentie

 

Die ick ghesont zijnde niet eens en achte

 

Als ic Gods strange / rechtveerdighe sententie

 

Van uren tot uren / ligghe en verwachte

 

Als den dach voorby is / en het naect den nachte

 

En my twijfelt / weer ic sal verdoemt zijn / oft vry // gaen

 

Heere alst my al af gaet / wilt my dan by // staen.

 

 

 

Als lutter yemant meer / met my vermaect // is

 

Deene moede gedient / dander moede gewaect // is

 

En elck mijnder moeyten / begint te verdrietene

 

Als den mont bitter / therte dorstich / verspaect // is

 

Als darme siele / die van duechden naect // is

 

Sorcht Gods rechtveerdicheyt / te genietene

 

Als dlichaem van vreesen begint te verschietene

 

En de tonghe niet meer / en can ghespreken

 

Alsmen daer wijwater / bestaet te ghietene

 

En tscheepken hem pijnt na zijn haven te vlietene

 

Alsmen de ghewijde keerse / doet ontsteken

 

Therte wil bersten / en dooghen breken

 

Als daer geen hope / en is / te ghenesene

 

En my sullen gheheyscht werden / jaren / en weken

 

Van dat ick begonste / eerst yet te wesene

 

Och alsmen dendelveers / begint te lesene

 

En de werelt sal segghen van my / tfy // saen

 

Heere alst my al afgaet / wilt my dan by // staen.

[p. 192]

PRINCE.

 

Princelijck Prince / door u liefde heet

 

Door u minnende herte / dat aent Cruyce spleet

 

Door u open vijf wonden vloeyende root

 

Staet my by inde ure / die ick niet en weet

 

Ontfermt mijns dan / door u bloedich sweet

 

Dwelck ghy storte / int Hoofken / uut vreese der doot

 

Als ick ligghe en gape / in duyterste noot

 

En my niet volghen en sal / dan mijn wercken

 

Sijt dan mijn leytsman / mijn Prince / mijn hoot

 

Jont my te nuttene / dlevende broot

 

Dwelck / my in mijn pelgrimagie / mach stercken

 

Geeft my warachtich berou / als kint der kercken

 

Volcomen biechte / al mijn Sacramenten

 

En wilt my beschermen / onder u vlercken

 

Als my bevechten / de helsche serpenten

 

U bitter doot / wilt in mijn herte prenten

 

Mijn sondige besmette siele / muecht ghy // dwaen

 

Heere alst my al afgaet / wilt my dan by // staen.