Seer scoon ende suyver boeck, verclarende die mogentheyt Gods, ende Christus ghenade, over die sondighe menschen

[p. 136]

Refereyn.

VErhuecht inden geest goetwillighe van gronde
De gratie is vonden die was verloren
Int eerts Paradijs / door Adams sonde
Gabriel brengt de bootschap uut Gods monde
Dat de vader heeft laten sincken sinen toren
De Prince des pays / is ons gheboren
Daer Esajas af hadde / ghepropheteert
David heeft Absalon vrede ghesworen
Assverus heeft Hester voor Vasthi vercoren
Aman is gehangen / Mardocheus triumpheert
Den pays is openbaer ghepubliceert
Doen dEenghelen songhen / vry van gheschille
Glorie si God die in thoochste regneert
Ende vrede / den menschen / van goeden wille
Pharao / is versoncken / inde helsche kille
Israel is verlost / van plaghen swaer
Dus segt in u ghebet / elck luyt en stille
God verleen ons vrede / dit nieuwe Jaer.

Ons nieu geboren Coninck / treyn Godlijc Lam
Een cleyn kint gheboren / te Bethleem int stede
Om den vader te payen / hy menscheyt aen nam
Doen dees vredelijcke Coninck ter werelt quam
Bracht hy sinen Godlijcken pays oock mede
In zijnder gheboorten / wast generalen vrede
Van geender Oorloghen men en wiste
Soe datmen van sweerden ploech ysers smede
Maer lacen nu sedt elck zijn sweert opt snede
De heylighe kercke / is vervult met twiste
Teghen die gheboorte van Anthicriste
Heeft Luther de heel werelt in roeren ghestelt
Den Christelijcken vrede / gheschoort met liste
Soe dat Petrus scheepken lijdt ghewelt
Kercken werden ghebroken / Cloosters ghevelt
De Juweelen ghestolen / van Gods Altaer
Dit doet my roepen / met verdriete ghequelt
God verleen ons vrede dit nieuwe Jaer.

[p. 137]

 

De hemelsche bode / Enghel Gabriel

 

Vercondichde vrede / sonder vermijen

 

Hier teghen heeft Luther / der waerheyt rebel

 

Onvrede vercondicht / aen alle zijen

 

Oploop doen maken met verraderijen

 

Teghen doverste / verwect de ondersaten.

 

Waer uut gheresen zijn bloedighe strijen

 

Destructien van steden / secten partijen

 

Dat vader en kint / malcanderen haten

 

Soe dat schier verslappen / alle staten

 

In haer goede offeninghe / voortijts ghehouwen

 

De Religieusen haer cloosters laten

 

Alle menschen inde liefde Gods vercouwen

 

So dat wy gheen van al / en zijn soo wy souwen

 

De wercken des vleesch zijn nu openbaer

 

Want twist en discoort / al dit quaet can brouwen

 

God verleen ons vrede / dit nieuwe Jaer.

 

 

 

Vrede is op eerde / dalder beste goet

 

Vrede / doet den mensch / met God vereenen

 

Daer vrede / daer God / daer neeringhe / daer voorspoet

 

Vrede cleyn dinghen / groot wasschen doet

 

Onvrede doet oock groote dinghen vercleenen

 

Vrede heeft Christus ghehouden al leenen.

 

Met wercken bewesen / met woorden gheleert

 

Dapostelen wel wetende / haer meesters meenen

 

Hebben door de wet des vreets / en anders geenen

 

Door dEvangelie des vreets de werelt bekeert

 

In tijden van payse wert God best gheeert

 

bidt sonder ophouden / tstaet in Paulo bescreven

 

Voor Coningen en Vorsten / daer ghy af wert beheert

 

Op dat ghy moecht leyen een vredelijck leven

 

Vrede heeft Christus zijnen vrienden gegeven

 

Int laeste Avontmael scheydende van haer

 

Want ons dit testament van Christo is bleven

 

God verleen ons vrede / dit nieuwe Jaer.

[p. 138]

 

Vrede hout steden in haer playsantie

 

Gheen dinck en machmen daer by gelijcken

 

Daer vrede is / vermeerdert de substantie

 

Daer vrede is / daer is goede ordinantie

 

Daer onvrede / is daer moet duecht wijcken.

 

Neeringhe en voorspoet / blijft buyten dien dijcken

 

Onvrede is eerst uuten duyvel gheresen

 

Vrede uut God so scriftuere doet blijcken

 

Als wy doude historien / gheesten / cronijcken

 

En de heylige scrifte wel duerlesen

 

Soo vinden wy vrede / zeer hoochlijck ghepresen

 

Van heydenen / Joden / Oratoren / Poeten

 

De Christen Doctoors geven ghetuych van desen

 

Apostelen / Evangelisten / Propheten

 

Beter is drooch broot / met rusten gheten

 

Dan veel gerechten / met onrusten / dit vint elc waer

 

Dus moghen wy wel bidden / die dit weten

 

God verleen ons vrede dit nieuwe Jaer.

Princelijck Prince / wy bidden begheerlijck
Aensiet ons lijden aenhoort ons claghen
Tis al in roere / gheestelijck en weerlijck
En u bruyt / de heylighe kercke roept deerlijck
Heere verleent ons vrede / in onsen daghen
Met uwen godlijcken pays / wilt discoort verjagen
Aenmerct u discipulen / arbeydelijck royen
Tschip der heyliger kercken teghen wint en wagen
Tis in groot perijckel door stormige vlaghen
Dwater der tribulatien wilder in vloyen
Jont ons u hulpe / want wilt ghijts u moyen
Almachtige Prince / des vreedts ghenaempt
Soo sal de heylige kercke / wassen en groyen
Alle haer vyanden sullen werden beschaempt
Natuerlijck soon Gods / God en mensch gelichaempt
Neerstelijck bidden wy u verre / ende naer
Alle die in Petrus scheepken zijn versaempt
God verleen ons vrede / dit nieuwe Jaer.