Het gulden cabinet van de edel vry schilderconst

[p. 520]

Ioannes, Ieronimus en Anthonius VVierx
ghebroeders, ende constighe plaedt-snijders van Anwerpen.

De Faem heeft stof ghenoch om vande Konst te raesen

Die VViericx op de plaedt eel, net en suyver thoont,

Al oft elck een Figuer waer van claer glas gheblaesen

Oft gheboetseert in wasch, soo wonder sich verschoont

Elck drucksel dat daer van ghecreghen heeft sijn wesen:

'Tis oft ghewassen waer met t'Schilders sacht Pinceel

Daer gheen Artseersel in en blijckt, soo uyt ghelesen

Staet hunne Konst oft sy ghemaelt waer op Panneel.

T'Graef-yser can sich noyt in netter Konst verheffen

Als dat te blijcken compt in VVierix handelingh,

Noch kol', noch loot, noch pen en connen naerder treffen

Het leven en Natuer als VVierix teeckeningh.