Het gulden cabinet van de edel vry schilderconst

[p. 509]

Perelle
Landtschap etser van Parijs.

SOmerse tapijt ciraeten
Die de grijse winters haeten,
Dat is t'geurich schoon gheblompt
T'ghene inde Lenten compt,
Groene Hoven, Lust-prieelen
Daer de Nachtegaels in quelen
Gaelderijen heel plaisant
By een groen beboomt warant.
Veer gheleghen fraey ghesichten
Die den gheest in't sien verlichten
Bosch, Ruien en schoon valley
Oft een gras bewassen wey,
Daer de Lammeren en Schapen
Gaen hun voetsaem costjen rapen
Oft daer water-vyvers staen
En daer Herders visschen gaen
En meer dierghelijcke saecken
Daer men Landtschap af can maecken
Etst Perelle op de plaet
T'gen' ghelijck het leven staet.
Soo bisaert, eel net en swirich
Suyver, krachtich en manirich
Datmen meynt het is schildry
En daer sijn gheen verven by.
Al de swerte omme-trecken
Op't papier hun soo ontdecken
Dat niet in Natuer en leeft
Oft sijn Konst daer deel van heeft.
Een verkeert verschil can baren
Sulckx dat onder Konstenaren
Perel ghelijck een Perel is
Door sijne Konsts ghesteltenis.