Maria Theresia, Anna Maria ende Franchoise Catharina van Thielen.
TOt een ghedenckweerdich verhael soo heeft my den jever niet sonder reden aenghelockt om hier oock by te voeghen den onberispelijcken lof die met volle recht verdient de Const-rijcke ende Deughtsaeme Joffvrouw Maria Theresia van Thielen gheboren Anno 1640. op den 17. Meert, door de ervarentheyt ende gheestighe handelingh die sy is hebbende inde oeffeningh van de bloem-rijcke Pictura, ende is daer beneven ten hoochsten te prijsen de cloeckheyt van haere voorschreven twee eyghen Susters, oock niet min uytstekende in dese lofbaer ende eerlijcke Const, ende alsoo alle dry in blomschilderen soo merckelijck aencomende datter niet door den Natuer in alderley schoonheydt van blom-ghewas en wordt ghestort, oft het selve can daer in op panneel door de afmalinghe van hun Consten wesentlijck ghespeurt worden, de voorschreven Anna Maria van Thielen is gheboren in't jaer 1641. ende Franchoise Catharina van Thielen in't jaer 1645. ende ghelijck den tijdt van ouderdom aen malcandren niet veel en verschilt, soo verschilt noch min hun Pinceel inde vry Schilder-const aende handelingh soo van d'een als d'ander die sy naer proportie, reden, ende natuer weten te ontdecken. Ten is niet vrempt ten opsicht dat den Natuer meest gheneghen is tot het ghene daer den Natuer af voorts compt, want ghelijck den Natuer ons het naest is bestaende ende den gheest oft het verstant stercker dwinghen en trecken can als duysent-derley vremde gheesten, die daer in eenighe nieuwe Const oft wetenschap soecken in te dringhen, soo wort hier seer oogh-merckelijck bewesen dat den Natuer der voorschreven gheest-rijcke jonghe Aencomelinghen ende teere Leerelinghen van Pictura, (die uyt den Natuer behoorden gheneghen te wesen tot vrouwelijck handt-werck, als tot soo een mannelijcke wetenschap) meer treckt tot dese vaderlijcke Const als andersints, overmidts den vernuftighen en wijt befaemden Jean Philips van Thielen hunnen Vader (inde selve Const ende stijl ervaren sijnde) en siende hun gheneghentheyt (meer uyt den jngheboren Natuer, als aenghedronghen onderwijsinghe op wassen) sijn voornoemde Dochters de selve Const met lust ende jever is inplantende, de welcke daer in soo ervaren worden dat men daer van hopt groote mirakels vande edele Pinceel metter tijdt te sien. Redenen dan sijn dese, dat ick wel mach segghen tot hun meerder eer ende lof: op het spreeck-woordt van den gheleerden Horatius: Fortuna non mutat genus.
Fortuyn is van soo wonder cracht
Dat sy manier, stam oft gheslacht
Noot sal verand'ren hoe het gaet
Maer houdt altijt in eenen staet
Jn eenen en ghelijcken stant
Waer van Natuer houdt d'overhant.
Soo d'Exter huppelt in het groen
Soo sietmen oock haer jonghen doen,
Soo voor soo naer, voeght sich Natuer
Om dat sy is ons naest ghebuer.
Des menschen ingheboren aert
Natuer ghestadich openbaert
Auteursrechtvrij