ROemdraghende Pictuer, nu wordt mijn gheest ontsteken
Om boven mijne macht u deughden uyt te spreken
Ter wijl dat u Pinseel is vol aertsinnicheyt
Die menichmael de oogh schier uyt haer paelen leyt:
Door t'lockaes vande Kunst vol uytghemunte leeringh
En jngheboesent drift van't cloeck verstandts vereeringh,
Die uwe mildtheyt schenckt aen die de kracht bemindt
Van uwe wetenschap, en haer met arbeyt dient.
Daer ons Van Hoeck ghenoch ghetuyghen af can gheven
Met een seer cleyne proef, die haer verthoont als t'leven:
Een proef van kleyn begrijp, doch wel van grooten sin
Die schier onsichtbaer is en heeft veel krachten in.
Dat is wanneer t'Pinceel weet aerdich voor te stellen
Een stuck vol krijghs ghewoel, dat qualijck is te tellen
Soo seldsaem, snel, en cleyn, is sijn Const-maelery
Die hy met grooten gheest can thoonen in schildry.
Jst in Batalien, oft ander Legher-tochten
Oft pestery in't velt, al waer cloeck wordt ghevochten,
Daer de Soldaten schier in dusenden bestaen,
En teghen t'Vyants Heir verwoet ten oorlogh gaen,
Met waghens wel versien, vol voor-raet, vrou, en kind'ren
En achter naer t'gheschut om t'vyandts macht te hind'ren
Al t'geen men speuren can in sijn Pinceels verthoogh
Js vrempt ten aensien van't verstants beschouwich oogh.
Midts datter niet en can aen d'ooghen soo behaghen
En t'gen is d'uyterste dat hun ghesicht can draghen,
Als ons Van Hoeck door Kunst brengt daeglijckx voor den dach
Soo cleyn en eel als oyt een menschen oogh besach.
[pagina 341]
[p. 341]
Robertvs van Hoeck. Controleur des fortications pour le seruice de sa Majeste en Flandre etc. peintre extreordinaire en petites figures, tres-bien estimez des amateurs et grands Seigneurs pour leur rareté né dans la ville d Anvers. G. Coques pinxit. C. Caukercken sculpsit.
[pagina 342]
[p. 342]
Jae soo ick al sijn werck ten vollen wou beschrijven
Mijn pen sou sonder eyndt verdoolt in't schrijven blijven,
Want hoe ick d'eel Pictuer al naerder ondersoeck
Soo vind' ick noyt geen eyndt in d'wercken van Van Hoeck.
Auteursrechtvrij
