Het gulden cabinet van de edel vry schilderconst

[p. 305]

Ian Benedetti Castilion
Schilder van Genua, soo in figuren, lantschap als in beesten.

DIe tot d'eel Schilder-const in sonder sijn gheneghen
En willen als in schael haer krachten overweghen

Tot voord'ringh van haer deught: en moeten d'oogh maer slaen

Op Castilions schildry, soo sy de Const verstaen.

Want al t'gen' Roomen can voor seld'saem ons bethoonen
In haer Const-camer (daer Picturas Vooghden woonen

(Als voedster van t'Pinceel, en woonplaets vande Faem)

Waer sonder luyster soo daer by ontbrack den Naem

Van Benedetti, die het leven naer can maelen
En al het levens aert uyt doode verwen haelen,

Die met een grooten lust, al wat verborghen is

In't wesen van Natuer oft haer ghesteltenis,

Can brenghen aen den dach en met Pinceel bewijsen:
Waer uyt men daeghelijckx Natuer schier siet verrijsen:

Sijn eer is sonder eyndt, ontelbaer, onbepaelt,

Door al de groote Faem en lof die hy behaelt.