T'Schijnt Troyen wordt noch eens vernielt door gloende tanden
Van t'onghenadich vier, men siet haer torens branden
Verbrijselen t'ghebouw, vergaen in drooghe asch
T'schijnt Troyen noch ghevoelt de vlam ghelijck 't eens was.
En aenden and'ren cant sien ick Gomorra roocken
En Sodoma vergaen, door t'vlammich solpher smoocken
Ghemenght met Godes straf, daer t'vier den mensch versenght
En al wat datter is tot cool en assen brenght.
Soo grouwelijck om sien dat (wie t'aenschouwt) moet beven
T'gen' ons van Heyl bethoont en schildert als het leven,
Soo veel ist dat de Const in sijn Pinceel vermach
Dat Phenix maer de vlam in sijn schildrijen sach.
Hy sou ghewis daer op sijn lichaem laeten daelen
Om sijne doodt uyt Const (in schijn) van vier te haelen.
Soo wonder haer de Const in plaets van vier ontdeckt
Dat daer in (soo het schijnt) de hitte maer ontbreckt.
Hier leeft sijn eel Pinceel als eenen Salamander
Ghedurich inde vlam, en dan weer op een ander
In't lieffelijck ghewas van t'groen ghelooft gheboompt
T'gen' sy oock door de Const het naest by t'leven compt.
Daer sietmen seldsaem groen, en omghedraeyde weghen
Die schijnen door t'verschiet heel uren veer gheleghen
T'gheberght van achter flauw, den voorgront uyt ghewerckt
Waer in men eene Const van grooten gheest bemerckt,
Daer somtijts Sephyr blaest, en maeckt een groene coelte
Somtijts een soete locht die gheeft een somer soelte
Daer somtijts Phebus door de swerte wolcken lonckt
En t'onghetempert weer tot natten reghen pronckt.
[pagina 293]
[p. 293]
DANIEL VAN HEIL est né de Brusselles lan 1604. est bon peinctre en paisages, travaille bien au vif, de mesme les maisons et villes bruslantes, ce qui se peult cognoistre par beaucoup de tableaux quil a faict. Iean Bapt. van Heil pinxit. Frederic Bottats sculpsit. Iean Meyssens excudit.
[pagina 294]
[p. 294]
Soo dat sijn wercken al staen door de Const seer crachtich
Somtijts niet als in't bruyn, bosch ende heuvelachtich
En somtijts suer oft soet, licht, leelijck ofte fraey
T'sy op den morghen-stont oft savonts doncker spaey.
Oft daer de gulde Son (den schoonen Dach-verlengher
Verjagher van't ghestarnt, en heeten Somer-brengher)
Verlicht den Orisont en terckt de dampen op
Die tot een spieghel dient van Ops bewassen Cop.
Soo dat al t'gen men siet in't somers daghen bloyen
Dat doet van Heyl door Const in sijn Pinceelen groyen
Soo datter niet een plaets oft wonder fraey ghesicht
Is buytens huys te sien oft t'wort ghebrocht in't licht.
Op doecken oft panneel door Const seer net verheven
Van Daniel van Heyl, ghelijck het enckel leven,
Vol rijpe gheesticheyt is't al het geen hy maeckt
Waer door oock sijn Pinceel in hooghen naem gheraeckt.
Auteursrechtvrij
