Peeter Danckerse de Ry Schilder van Amsterdam, anno 1605.
O Wijt befaemde Const die menich Rijck doorwandelt
Als ghy u eel Pinceel wel naer het leven handelt
Ghelijck in't Polsche-Hoff heeft menichmael ghedaen
De Ry, daer van sijn handt veel edel stucken staen.
Daer sijne Majesteyt was tot sijn Const gheneghen
Om dat sijn handelingh in d'eel Pictur te pleghen
Is aenghenaem en soet, jae hem soo wel beviel
Dat hy De Ry al langh voor sijnen Schilder hiel.
Ghelijck den Sweedtschen Vorst hem groote eer toedraeghde
Om dat sijn eel Pinceel op t'hoochst hem oock behaeghde.
Want sijn begaeft verstant in Conste van Pictuer
Compt seer wel over een met t'leven en Natuer
Daer ick in letter-druck niet veel en moet van spreken
Midts dat sijn eyghen strael compt als een Son uytbreken,
Die heden-daeghs verciert al menich Cabinet
Waer onder eenich werck is van sijn handt gheset,
Want al het geen hy doet is als het enckel leven
Besonder in Pourtret, wiens Const moet sijn verheven
Tot aen het Firmament, al waer Latonas Soon
Sijn peerden alle vier te toomen is ghewoon,
Soo lanck de Sonne straelt, en dat het vier sal barren
Soo lanck den Sodiac verciert is met de starren
Soo lanck de bleecke Maen verlichten sal den nacht
Soo sal de edel Const der Schilders sijn gheacht,
Soo sal de soete pen hun groote eer uyt vueren
Soo lanck sal d'edel Faem van Danckers blijven dueren,
Schoon dat Aragne spouwt haer swadder met veel spijt
Op d'edel Schilder-const uyt ingheboren Nijdt.
[pagina 289]
[p. 289]
Pierre Danckerse de Ry.Natifs à Amsterdam l'an 1605. Peintre en pourtraict de Sa MajesteVladislaus iv. du nom Roÿ de Pologne, et Swede, etc. Petrus Danckerse de Rij pinxit. Ioan. Meyssens excud.
[pagina 290]
[p. 290]
De Gheesten van des' eeuw die sullen haer doen leven
En door de Const Goddin een helder weerlicht gheven,
Waer in de groote cracht der vry Picturas Cunst
Soo diep is inghescherpt in Natuers milde gunst.
Dat Momus noyt en can uyt haet hun rust verstooren
Auteursrechtvrij
