Iustus d'Egmont
Schilder van Leyden Anno 1602.
TEn is niet te verwonderen dat den Coninck van Vranck-rijck Lowis den XIII. desen Justus d'Egmont voor sijnen Schilder hiel ende in zijn Conste groot behaeghen hadde, aenghesien de selve was overloopende ghelijck een Bron van overvloedighe weetenschappen, de welcke in Picturas Cabinet verborghen zijn. Daer wert eertijts een mudde vol gout voor een stuck van Apelles bereyt: op eenen anderen tijt voor een schildery die Timomachus gheschildert hadde, ghegheven tachghentich talenten ende meer sulcksdanighe giften zijn vereert aen verscheyde Constenaers. Soo ist dat d'Egmont oock in Vranck-rijck soo vanden Coninck als andere edele Heeren niet alleen met groote giften, maer mette hooghste eer ende princelijcke jonste (die alle rijckdommen te boven gaen) begift is, en ter wijlen Jtalien, Vranck-rijck, en andere plaetsen die met sijn Const verciert zijn, ghetuyghenis ghenoech gheven met wat lossen aert de selve door de edele Pinceelen van Egmont soo in't groot als cleyn is uytghewerckt, soo doght my onnoodich ende om cortheyts wille des selff schildrijen naer den sin ende wesen hier aen te wijsen, den welcken om zijn ervarentheyt inde oeffeninghe der selver Const noch teghenwoordich is Schilder, ende Domestiq van het Franse-hof onder het ghebiet van Lowis den XIIII. alwaer hy daeghelijcks door verscheyde afbeldinghen der historien en andere voorvallen den Edeldom tot nieuwen lust verweckt om sijn handelingh te beminnen.
Auteursrechtvrij