Ian Thomas
Schilder van Ypren.
DE pen en heeft oock niet willen vergeten te beschrijven ende hier met reden mentie te maecken van Jan Thomas gheboren tot Jpren die de edel Schilder-const gheleert heeft by den voorseyden Rubbens daer hy zijnen tijt soo waerghenomen ende daer naer in verscheyde Landen soo diep en veer ghesocht heeft dat hem de fortuyn het gheluck heeft ghejont om Schilder gheweest te hebben vanden Bisschop van Ments ende nu vanden Keyser Leopoldus, ick laet den Leser oordeelen oft sulcken Monarchen ende edel Potentaten sullen begaven met soodanighe eer ende gheluck eenighe Schilders van kleyne wetenschap, ter wijlen by hun geen schatten soo costelijck en zijn om de selve mede te deelen aen de beste Constenaers ghelijck desen Thomas eenen is, die voor gheen ervaren Meesters van d'edele Pinceel en moet wijcken, uyt reden sijn wercken soo in Italien, Spanien, Duytslandt als Nederlandt ghenoch aenwijsen wat costelijcke wetenschap daer in verborghen leyt. De Faem heeft my meer van sijn daden ende wercken voorghespelt als sijnen ouderdom my onbekent, die noch in't leven is en woont in't voorsz. Keysers Hof.
Auteursrechtvrij