Het gulden cabinet van de edel vry schilderconst

[p. 212]

Daniel Seghers
onder het gheselschap vanden Heilighen Naem Iesus.
Constich Blom-Schilder van Antwerpen, gheboren anno 1590.

ALs ick Picturas Hof met vreughden had doorwandelt
Al waer de schoon Pinceel der Schilders wort ghehandelt,

En dat mijn liefde had haer Consten vergheselt

Door d'aenlock der Schildry en menich deftich belt.

Den gheest verhonghert bleef om noch wat meer t'aenschouwen
Midts mijn Const-gierich hert van Flora wert weerhouwen,

Die daer de gulde poort van haren hof ontsloot

Waer Gloris al t'gheblompt met water staegh begoot.

Dat sy aen een Fonteyn met silvre gieters haelde
Om dat het sonnen licht t'ghewas te seer bestraelde,

Den schoot der vruchtbaer aert was heel ghecoloriert

Met alderley coleur gheverft en opgheciert.

De roosen stonden daer als gloyende robijnen,
Die t'glansich hemels licht seer constich quam beschijnen,

Alwaer dat Zeghers sat in Floras lust Prieel

En boetsten aerdich naer t'gheblompt met sijn Pinceel.

Vol schoon vermenght coleur heeft hy de Const ghedreven
Al oftse had gheweest in't bloesem van haer leven,

Want hy wist door den gheest te maelen alles af

Dat hy een jeders oogh haer volle voetsel gaf.

Sijn Animonien, Pinceen, Tullipanten,
Renonckels en Garnaet, jesminen en Tillanten,

Harssouwen, Collebloms, jenoffels en jenet

Picenen Lelien, Acqleyen en Filet.

Lisblommen Winter-roos, Narcissen, Hiacinten
Doorweven met groen veil en helle sije linten,

Trompons, en Ridderspoor, Violen Maternael

Regatten en Ionckils Croonen jmperiael.

[p. 213]

DANIEL SEGERS FRERE IESUITE Un de premiers painctres de nostre temps, en fleurs natureles: il a faict son aprentisage chez Iean Breugel. l'on trouve de ses chefs d'oeuvres. dans les courts des grandes Seigneurs. l'Empereur d'Alemaigne, et l'Achiducq, Leopolde Guillelme ont beaucoup de ses pieces. S.A. le Prince d' Oraigne Henri Fredericq luj a faict deux presents pour deux pieces de sa main, une dixiesme et une crois d'or masif, toutes deux de grande valeur, il teint maintenant sa residence en Anvers dans la maison de proffesse des Peres Iesuites.
L. Livens pinxit. I. Meyssens excudit.

[p. 214]

 

Sijn Cassidonien, Maeghdlieven Affricanen

 

Eul-blommen, Simbolins, Felieren en Pavanen,

 

Staen altemael soo soet en aerdich afghemaelt

 

Soo gheestich, mals en net, jae grondich uytghehaelt.

 

Soo fraey ghecoloriert dat t'leven schier doet wijcken

 

Door d'edelheyt der Const, die t'leven schijnt te gh'lijcken,

 

Vol cloecke sachticheyt seer aenghenaem en soet

 

Dat Breughel vol van gheest daer voor noch wijcken moet.

 

De snel ghewiechte Faem met lof sijn Const beperelt

 

En maeckt Freer Zeghers naem seer kenbaer al de werelt,

 

Het edel Hollants Hof dat gheeft ghetuyghenis

 

Hoe t' Princen Cabinet daer med' behanghen is.

 

Henricus Frederick sijn jonst oock wilde thoonen

 

Aen dese suyver Const als hy haer quam verschoonen,

 

Met menich schoon juweel van lauter gout ghesmet

 

Als hy aen Daniêl gaf een aerdich fraey Palet.

 

Een Thientien met een Cruys en twelf Pinceele stecken

 

Waer med' hy Zeghers Const quam tot nieu' lusten wecken

 

Een Maelstock van fijn gout, dat d'eel Princers hem gaf

 

Daer op een doots hooft staet, tot teecken van sijn graf.

 

Tot een velt teecken dat het leven vande menschen

 

Moet als een weecke bloem in corten tijt verslensen,

 

Ist wonder cloecken gheest terwijl ghy al t'gheblompt

 

Met veel vervich coleur soo by het leven compt.

 

U weerdicheyt is weert naer alle recht en reden

 

Met grooter lof en prijs of ghiften aenghebeden,

 

Ghy hoogh begaeft verstandt van Princen weert bejonst

 

Seer mildelijck verrijckt van t'margh der Schilder-const.

 

Uyt muntende vernuft, u hooch verheven sinnen

 

Doen u door dese Const de grootste eer verwinnen,

 

Ghelijck de blom versoet de locht door haren geur

 

Soo is oock u Pinceel in haren hoochsten fleur.

[p. 215]

 

Soo ciert oock u Schildry des Coninckx Cabinetten

 

Voor d' aenghenaemst juweel dat jemandt voor can setten,

 

T'ghevoelen en den reuck ghebrecken maer daer in

 

Het leefden anders al naer jeders hert en sin.

 

De biekens souden strackx naar hun volcomen lusten

 

Met groote vreught daerop in volle soetheyt rusten,

 

Want schoon den levens aert in sijn Schildry ontbreckt

 

T'is meerder als de Const dat in sijn blommen steckt.

 

De Const en can ons maer een levens schijnsel geven

 

Maer die sijn blommen siet die sietse aen voor t'leven,

 

Die gheenen worm oft mol in't minst beschaden can

 

Want sy is afghepluckt, de wortel isser van.

 

En sonder wortel wort ghesaeyt op sijn Paneelen

 

De wortels moeten dan sijn Zeghers eel Pinceelen,

 

Dat is den rechten gront, sijn doode verf bethoont

 

Dat door Freer Zeghers Const het leven in haer woont.

Tot een teecken dat den soeten aert der blommen die door desen godtvruchtighen ende Const barenden Appelles t'heel Nederlandt door verbreyt jae in verscheyde Coninck-rijcken bekent is soo en heeft den gheleerden ende vermaerden Poeët wonende tot Amstelredam in Hollant by naeme Joos van Vondel niet qualijck tot lof van Zeghers uyt de pen laten vallen dese veersen luydende in corten sin aldus:

DEn gheest van Zeghers is de By
Waerop de Neerlanders roemen
Sy suyght haer honingh lackerny
En geur uyt alderhande bloemen.
Een Bie quam op sijn Schildery
En geur en kleuren aenghevloghen
En riep Natuer verghevet my
Dat Blom-pinceel heeft my bedroghen.

Waer teghen de Nederlanders oock met volle recht tot sijnen lof moghen segghen ende singhen aldus:

Arte sua haud similes Flores pinxisset Apelles,

Quos toto acceptos Daniel Orbe dedit.