MEt wat een lauwer loof, oft groen olijve spruyten
Diet nu het geestich Breyn van onsen Both ghehult,
Met wat Poësij pen wil ick sijn roem besluyten;
Die soo den lof en d'eer van sijne Const vervult.
T'herdencken gans beroert al mijne vry ghepeynsen
Soo ick mijn ooghen slaen op sijn verheven werck
En mijnen lust ontwaeckt jae doet gheheel ontveynsen
Midts ick daer in niet als Naturas cracht bemerck,
Waer uyt te speuren is het leven van ons leven,
Waer op ons leven steunt, en t'levens hope baert
Dat is het soet ghewas t'gen' daegh'lijckx wordt ghegheven
Door Godes zeghen uyt de groen en vruchtbaer aert.
Dit wist Both met t'pinceel soo wonder af te maelen
Dat al sijn maelery door haere geesticheyt
Den mensch (die Const bemindt) met jever can bestraelen
En menichmael het hert tot haere deught verleyt:
De dreven des warandts veer uyt t'ghesicht gheleghen,
Het blader-rijck gheboompt, valley, en hoogh gheberght,
Het straelen vande Son langhs onbevolckte weghen
En noch meer lieflijckheydt t'gen' jeders gheesten terght
Dit alles saem ghevoeght door cracht van Boths Pinceelen
Wel op sijn maet ghestelt en fraey gheordonneert
Op eenen effen doeck oft fijn gheschaeft panneelen
Wijst aen het uyterste dat ons Pictura leert.
T'waer herseloos ghebroet vol haetighe ghebreken
Dat sonder oordeel is van Midas overschot
Soo wie uyt bot verstant de Const wou teghen spreken
Die ons ten thoone stelt den gheest van Ian de Both.
[pagina 157]
[p. 157]
IEAN BOTH Bon painctre en paijsages bien ordonnées, a la veue bien douces, les devants forts, et bien coulerées garnies des figures, et animaux bien entendües. se tient maintenant a Vtrecht ville de sa naissance. Abr. Willems pinxit. C. Waumans sculpsit. I. Meyssens excudit.
[pagina 158]
[p. 158]
Een Const die niet en soeckt van jemandt eenich voordeel
Om die te prijsen oft te blamen teghen reën,
Maer midts de ooghen sijn voorloopers van het oordeel
Soo dunckt my dat dees Const noyt worden can vertreën:
Schoon dat mijn pen te vroech laet haeren beck besnoeren
Om meerder (naer verdienst) den weert befaemden lof
Van Both, om sijn vernuft hier claerder uyt te voeren
Ter wijl my overschiet noch veel bequaeme stof,
Waer-in gheleghen is t' wit, om van hem te roemen
Daer ons de daet hier gheeft ghetuyghenisse van
Sulckx datmen hem hier mach wel een groot Meester noemen
Midts t'self' ons daeghelijckx sijn werck bethoonen can.
Auteursrechtvrij
