Het gulden cabinet van de edel vry schilderconst

[p. 127]

HENRY VAN DER BORCHT De Brusselles ou il naquit l'an 1583. d'ou il fut, emmene en Allemaigne par les troubles l'an 1586, et apres il at appris la Peinture Chez Gilles de Valckenborgh Estant retourne d'Italie il a demeure a Franckendael iusques en l'an 1627 quil est venu demeurer a Francfort au Palatinat, estant aussi un amateur admirable de toute sorte de raretez et antiquitez auisy, que le Conte d'Arondell le Cherischoit pour les rares pieces et Curiositez qu'il auoit en de luy, tant en Medalles que Peintures et autre sortes d'Antiquitez.
Henricus van der Borcht iunior pinxit, W. Hollar fecit 1650, Ioannes Meyssens excudit.

[p. 128]

Henrick vander Borght d'Oude
Schilder van Brussel.

HEnrick vander Borght is gheboren tot Brussel in't iaer 1583. van waer dat hy is ghevoert naer Duytslandt door de troubelen die in't jaer 1586. hier te Lande waren, ende heeft daer naer de Schilder-const gheleert by Gilis Valckenbourg. is oock gheweest in Italien, hy heeft tot Franckendael ghewoondt tot het jaer 1627. ende daer naer tot Franckfort, hy was een wonder beminder van alle rariteyten ende anticque dinghen, soo dat den Hertogh van Arondel sijn rariteyten soo van Schilderijen als curieuse Madaillen en ander soorten van fraeyheyt in groote weerden is houdende.

Ten is niet te verwonderen dat de grootste geesten, Personagien des werelts de seldsaeme Consten (die eenighe sonderlinghe gheest) uyt-wercken, grootelijckx beminnen ende in weerden houden, aenghesien een jeghelijck met sulck gheluck niet begaeft en is om door sijn verstant eenighen Monarck te behaghen daerom en hebben de Coninghen geen meerder miltheydt ghetoont als aen uytghelesen Meesters die door eenighe vremde wercken, hun mildtheyt ghemeyn maeckten. Alexander den Grooten gaf aen Aristoteles boven alle noodighe middelen acht hondert talenten, dat is de weerde van vier hondert tachentigh dusent Croonen, om dat hy de natuer der dieren soude beschrijven. Men leest dat den Ghenees-meester Teombratus ontfingh sestich dusent Croonen om dat hy den Coninck Antiochus van seker sieckte ghenesen hadde; sekeren Tadeus die Doctoor te Florencien was creegh sulckenen Naem om sijn Const ende gheleerdtheydt dat hy alle daeghen eens uyt de stadt gaende, om sijn Const te pleghen, won vyftich Croonen soo dat den rijckdom, eeldom, oft schoonheyt (daer den Mensch mede begaeft is) van soo grooten cracht niet en sijn als alleen de wetenschap van Const oft gheleertheyt, hoe menich arm Jongman die van een cleyn nederich gheslacht gheboren is, wordt om sijnen geest ende besondere gratie in eenighe wetenschap te pleghen, by Coninghen en Princen niet op-ghetrocken ende bemint ghelijck Hendrick vander Borght oock vanden Hertogh Arondel om sijn eruaren wetenschap ontallijcke weldaden heeft ontfanghen die van goeden ouderdom ghestorven is doch het jaer aen my onbekent.