Toe-eygeningh aen de vrome ionghmans Cornelisz Iacobsz ende Heyndrick Iacobsz.
NAe dien dat hier in Amsterdam soo veel verscheyden Liefhebbers vande Rijm-konst zijn, daer ghylieden beyde mee Liefhebbers van zijt, (nae dat ick gehoort heb) ende insonderheyt vanden sinrijcken Rijmer G.A. Bredero, niet te min soo bid ick V. L. beyde, ende laet dit gheringhe werck by V. L. huysvest hebben; die ick V. L. beyde toeeyghene, verhoopende dat het desghelijckx by V. L. beyde, ontfanghen sal zijn: Niet aensiende het slecht ghedicht, maer de goet gunsticheydt die ick V. L. beyde toedraghe. Want soo ick een jaer ofte twee inde Rijm-konst genocht gehadt hebbe, ende niet volbrocht en heb, soo heb ick int lest onder andere Historien (soo wel Fransch' als Duytsch') gevonden de treffelijcke historien (ofte treur-spelen) vanden vermaerden Poët (ofte Rijm-schryver) Robert Garnier: Alwaer ick dit teghenwoordighe treur-spel invondt, het welck my seer wel behaechden ende waerdigh achten om het selve uyt de Fransche rijm over te setten (in dese Nederduytsche rijm) ende in druck kte laten uyt gaen, om V. L. beyde te vereeren, het welck ick V. L. wilde bidden het selve in achtbaerheyt te ontfanghen: Al en is het nerghens nae de beste niet, nochtans hebbe ick het nae mijn best vermoghen ghedaen het welck seer kleyn is, door dien ick noyt in eenighe studie en heb ghestudeert, noch noyt in Vranckrijck en heb gheweest, maer altijdt in Engelandt heb ghewoont op een jaer drie ofte vier nae, waer over dat ick hope dat ghy lieden beyde kennisse daer van draghen sult, ende andere spotters ende berispers antwoort sult konnen gheven, dan ick hope die wat verstant heeft, die sal by zijn selven kennisse draghen, ende dencken dat daer niet een boeck en is sonder eenighe fauten, daerom soo daer eenighe fauten met rassicheydt van schryven of met drucken voor by gheslipt zijn (ghelijck het licht kon ghebeuren) wiltse doch ten besten keeren, (dan wat ist) tis hedensdaechs een manier dat yeder een balck in een anders oogh kan sien ende qualijcken een splinter in hun eyghen, dan ick denck als elck zijn werck wel doorsiet hy en sal't sonder fauten niet vinden. Voort soo daer eenighe waren die dit spel nae ginghen soecken inde Fransche Historie: Sy en sullen't niet vinden juyst ghelijck het Frans, want ick hebbe het soo hier ende daer wat verandert om op de Nederduydtsche manier best te voeghen, ende sooder eenighe uytheemsche woorden in zijn, soo denckt dat het uyt een uytheemsche tael over-gheset is, ende datter daerom te meer in gheslopen zijn als daer wel anders soude wesen, dan men kan yeder zijn niet doen. Dit ende het vervolghen is het gheen daer ick V. L. beyde over Heeren van maeck, V. L. beyde biddende het selve met sulcken goeden wille te ontfanghen als het V. L. beyde toegheeygent wert.
V.L. beyde dienstvv. Dienaer W. de Baudous.
Auteursrechtvrij