Cracov by den Grave van Busquoy beleghert ende verovert / in Novembri, Anno 1605.
[1605.] DEn vijfden dach Novembris is de Grave van Busquoy gecomen voor het stercke huys Cracou, in een moerighen ende sompighen grondt gheleghen / doch door de langh-duyrige droochten deses jaers / condemen daer lichtelijck rondtom her comen/soo dat de natuyre der plaetse nu falierende/de fortificatie ende 'twerck van Menschen handen niet ghenoechsaem en was om groot ghewelt langhe teghen te staen. Op dit Casteel was Gouverneur de Heere van Swieten, Colonel over een Regiment Voet-volcx/een treffelijc Hollandts Edel-man/ cloeck ende couragieus/by sich hebbende ontrent vier hondert Soldaten/ ende van alles tamelijck wel versien. Doch de Gouverneur en hadde gheen behoorlijck commandement over het Crijchs-volck / maer wat hem goet docht/ dat mishaechde eenighen Capiteynen ende Officieren/ die meer haer eyghene sinnelijckheyt volchden / dan des Gouverneurs commandement. Jmmers doe sy sagen dat haren vyant haer met sulcke resolutie ende couragie aen-viel/soo verlieten ende verliepen sy den viii. Novembris de halve mane voor de Poorte ligghende/ende weken met een ghedruys op het Casteel/ alwaer sy stracx soo besloten ende benaut wierden / dat sy haer moesten overgheven in handen van haren vyandt/op sijn ghenade [1605.] ende onghenade/die haer geen ander appoinctement en heeft willen gheven/dan dat de Gouverneur/Capiteyns/ ende Officieren souden uyt-trecken alleen met haer sijd-gheweer / ende de Soldaten met eenen stock in de handt/ achter-latende haer gheweer ende baggagie.
Nae de veroveringhen van Wachtendonck ende Cracou heeft de Marquis Spinola sijn Legher laten op-breken/dat hier en daer in garnisoen versendende. De Engelsche Regimenten onder den Baroen Arondel, ende den Ridder Marcham, den Arch-Hertoghe voor Wachtendonck goede diensten ghedaen hebbende tot hare groote schade ende verlies/zijn tot Tienen in garnisoen gheleyt/doch op een corts zijn sy seer gesmolten / meest verloopende / want sy claechden datse qualijck betaelt wierden. Sijn Excellentie heeft oock den xxiii. Novembris sijn Legher verdeylt ende in garnisoen trecken laten / latende sijn Ghenade Graef Ernst van Nassou binnen Rijn-Berck/ binnen Meurs legghende sterck garnisoen. Sijn Excellentie is eerst den tweeden Decembris in den Haghe aen-ghecomen.
De oude Latinisten segghen:
Communis est Mars, & melior saepe caussâ, pugnâ est inferior.
Auteursrechtvrij
