Nieu liedt-boecxken inhoudende verscheyden liedekens op die principale feest-daghen ende ander heylighe daghen vanden jaere
(1614)–Rumoldus Batavus–
Auteursrechtvrijop de wijse: vanden 14. Psalm. O Heer wie sal in uwen tent. etc.Wy dancken v, O Heere goet
In al des werelts hoecken,
Nae dat ghy hadt ghestort v bloet
Soo coemt ghy ons besoecken.
V Heilich Euangelie claer
Dat hebt ghy ons laeten preecken
Want al die werelt salt worden ghewaer
Soo ghy Heere selfs gaet spreecken.
Want eer dat coemt den ionsten dach
Door al die werelt ronden,
Salmen hooren van Christus ghewach
Daer zijn dienaers sullen worden gesonden.
Ghy hebt, Heere, in desen laesten tijt
Ons Heydenen al hier int Noorden,
V dienaers ghesonden al metter vlijt
Daermen te vooren noyt van v en hoorden.
Een heylich mensche hebt ghy verweckt
In uwen weth zeer wel eruaeren,
Die wt liefden in dese landen treckt
Om v woorden daer te doen openbaeren.
Willebrordus is hy ghenaemt
In Enghelant was hy ghebooren,
Dese en heeftet hem niet gheschaemt
Om den Afgoden alhier te doen verstooren.
Hy was een Priester seer Catholijck
| |
[pagina 105]
| |
Wijs gheleert, en wel ter taelen,
Daer toe zoo leefde hy oock heilichlijck
Wt der hellen woude hy ons haelen.
Maer eer dat hy tot ons lieden quam
Trock hy in Yerlant zoo wy lesen
Daer hy in wijsheyt seer toenam,
Door gheleerden die hem daer onderwesen.
Hy en nam den macht van selfs niet an
Daer veele nv zijn toe gecomen,
Maer reysde aen Sergius den goeden man
Doen wesende der Paus tot Romen.
Sergius worde veropenbaert
Door een Engel van Gods weghen
Dese heeft hem alzoo veel verclaert
Willebroort heeft zyn wil vercreghen.
Het is ons mede oock wel bekent
Dat hy een nieuwen naem daer heeft ontfanghen
Den Paus die noemde hem doen Clement
Eer hy nae Hollant is gheganghen.
Nae dat Clemens nu dese macht
Al vanden Paus hadde vercreghen
Soo dede hy veel teeckenen door Godts cracht
Ghelijck die Apostelen oock pleghen.
Radtbout was Coninck op dat pas
Tot Medenblick als doen woonachtich
Die noch vol afgoderie was,
Met al zyn vriesen eendrachtich.
Dese heeft hem zeer verstoort,
Datmen zyn oude goden ginck vernielen
Hierom ontboot hy daer Willeboort
Daer veel stercke woorden vielen.
Want Willebroort was niet verueert
Maer hy sach den Coninck onder ooghen
Hy heeft zyn salicheyt zeer begheert
Maer hy wilde blieueb bedrooghen.
Willebroort voorts nae Vranckrijck treckt
Om Pepinum al daer te spreecken,
| |
[pagina 106]
| |
Want Radbout was Pepijn subieckt
Die riet hem Gods woort te preecken.
Dus quam Willeboort al nae Hollant
Want hy had nu consent ontfanghen,
Dus preeckten zy Gods woort gelijcker hant
Door stadt, en dorp syn zy geganghen.
Hy hadde noch elf met hem ghebracht
Die het lant ouer al door liepen,
Sy leerden alle met goet eendracht
En tot Christum zy die menschen riepen.
Catholyck, hebben zy gheleert
En waren oock heylich van leuen
Sommighe van desen sijn gemarteliseert
En hebben Godthaer zielen zoo gegeuen
Die sommighe waren van Coninckx bloet
En quamen wt liefden ons bekeeren
Achter latende haer gheslachte en goet
Doende veel teeckenen inden naem des heeren.
Dit gelooue moest immers sijn correckt
D’welck Godt door miraeckelen heeft bewesen
En wy sien dat dese dit nu ontbreckt
Die cort onder ons sijn op gheresen
Door Gods liefde die Willeboort dreef
Heeft Godt door haer ons comen besoecken
Doenmen seshondert, seuentnegentich schreef
Soo ons verclaren die oude boecken.
Sy en sochten niet haer eyghen eer.
Noch quamen niet mede ongesonden
Maer preeckten hier die oude leer
Die sy tot Romen hebben gheuonden
Willeboort die ons Apostel is
Die behooren wy altoos te prijsen
Hy bracht ons wt die duysternis
En Gods licht dede hy ons eerst wijsen.
Dit heylich ghelooue zeer hooch bemint
Daer wy dus langhe in hebben gheseten
Negenhondert iaren, of daer ontrent.
| |
[pagina 107]
| |
Wort van veele nu wederom versmeten.
Oorloof ghy broeders van Hollant
Dit is v wt liefden gheschoncken,
By Godt en can comen niemant
Dan door dit geloof dat hier eerst heeft gecloncken.
|
|