Poemata

[p. 205]

Amstelodamvm.

VRbs spaciosa, potens opibus, tectisque superba,

Viribus invidiam, crimina lege domat.

Civibus aucta novis nunquam stat finibus ijsdem,

Latius expansis moenibus hospes abit.

Invertas, fit tota nemus. quo condita fundo est,

Nuper Hyperboreo pinus in orbe fuit.

Quicquid mortalis fingit solertia curae,

Vel natura suo parturit alma sinu,

Illa dabit, totoque parans commercia mundo

Nunc emere, & totam vendere semet amat.

Has adfert, has trudit opes. sic lucra parantur.

Quid valeat fraus, sors, ars, mare, terra, docet.

Moschus, Arabs, Persae, Maurus, Iudaeus, uterque

Quod ferat huc, rursusque auferat, Indus habet.

Hanc dum mundus adit, mundumque haec ipsa pererrat,

Non urbs fixa loco, sed vagus orbis erit.