Poemata

Delphi in Batavis.

NOn ego fatidicis oracula suggero Delphis:

Aut mea falsiloquus moenia Phoebus habet.

AEtherei responsa patris do civibus, & me

Relligio, Graiûm non beat iste furor.

Infelix rapidis flagravi tota favillis,

Cum rogus, & simplex nil nisi flamma forem.

Condiderat tantos secura oblivio casus,

Cum Patriae media concidit urbe pater.

Quid rides Hispane? tui quoque nominis umbram

Cernimus, atque ista caede Philippe cadis.

Venales animas in mortem insontis acerbas,

Venditur at precio regia fama suo.

Nunc tu Belga duos uno sub marmore Martes

Adspice, Nassoviae nomina magna domus,

Mauritium, Patremque, Duces: haec numina sensit,

Et tutelares terra Batava Deos.

Sed magis Henricum fuerit genuisse. quid horres

Cantaber? en patrij funeris ultor adest.