Poemata

[p. 180]

In Hollandiae Australis, à Doctissimo viro Iacobo vander Eyck, I.V. Doctore descriptae, partem aquis mersam.

QVi legis haec lector; Batavae dispendia terrae,

Et proavûm moerens grandia damna legis:

Tot mersas pelago terras, populosque domosq́ue,

Et malè terrarum iugera tuta Deis.

Viderat has clades, & prisci incommoda secli

Eyckius, & patriae naufraga busta suae.

Nominaq́ue ut sensit tenebris, & fluctibus abdi,

Et rerum memores vix superesse notas,

Surgite, ait, veteres, Faunorum praedia, villae,

Alteraque exstinctis vita resurgat agris.

Quos mersistis aquae, chartis signantur in istis,

Praeteritosq́ue legunt secula nostra dies

Si quid in has iuris Thetys habet improba terras,

Imperium tantae diluet horae Deae;

Temporaque amissas reddent venientia sedes,

Quaeque natant, lucrum posteritatis erunt.

At liber hic tardè gradientes occupat annos,

Et decus antiqui contrahit omne soli.

Non ultrà Neptune noces. quodcunq́ue relictum est,

Aut perijt, vultu non pereunte damus.

[p. 181]

 

Scribimus hic Mervae dominos, Mervaeq́ue fluenta,

 

Totque paludati iura superba Ducis;

 

Quosque capit fines, Roverî sub fascibus, Auster,

 

Multaque Battaviae regna sepulta meae.

 

Sic pelagi rabiem, sic Divûm eludimus iras,

 

Et prosunt chartae, dum nocuistis aquae.