Poemata

[p. 177]

Ad Doctissimum, Ornatissimumque Iuvenem, Iosephvm Vorstivm, Aelii Everardi Vorstii filium, quum post publicam disputationem Iuris Vtrinsque Doctor renunciaretur.

INusitatum cur mihi barbitum,
Situque foedam tendere me chelyn,

Iosephe, cogis? cur triumphos

Dedecoras strepitu poëtae,

Me vate famam, pilea versibus?
Cur invidendis clarus honoribus,

Nec testis expers, vile speras

Pauperis officium Camoenae?

Dos ipsa virtus est sibi: quam sequax
Licet procetur nominis ambitus,

Se debet aevo, sola victrix

Invidiae, immemorisque fati.

Crescis merendo, nec titulos tibi
Ignava scribit gratia; nec favor

Aut servit indignae Iuventae,

Aut vitium precio coronat.

Tu iuris acri praesidio potens,
Intorta legum dogmata dissecas.

Tu Principum consulta gnarus

Excutis, & sinuosa Baldi

[p. 178]

 

Praecepta pandis. Tu Decios sagax,

 

Accursiosque, & nomina labili

 

Erepta seclo, quaeque terris

 

Sol Oriens dedit, Occidensque,

 

Edicta Regum digeris arbiter:

 

Gravesque iussus Caesarei fori,

 

Et vindices recti secures,

 

Et scelerum recitas catastas.

 

Astraea tali praeside laetior

 

Terras revisit: iura legit reis;

 

Nec innocens causa vacillat,

 

Nec veniam meruere culpae.

 

Privata cedunt commoda publicis;

 

Emptum tribunal displicet; & manus

 

Avara lucri, quae nefando

 

Iudicijs famulatur auro.

 

Cives tueris: fraudibus obicem

 

Obdis profanis: te lachrymabilis

 

Pupillus exorat, rogantque

 

Te vidui gemitus patronum.

 

Praestat trophaeis tuta domi salus,

 

Victisque Iberis iustitiae rigor.

 

Plus iura condidisse Belgis,

 

Quam peregrè domuisse Calpen,

 

Formidolosis vel mare classibus

 

Stravisse totum. Scipiades pater

 

Plus cive servato superbit,

 

Quam domitis Numidûm sarissis.

 

Quin litterato nobilis otio,

 

Per Graia raptus compita, Graeciae

 

Fontes bibisti, nec Latinae

[p. 179]

 

Inferior studijs Minervae.

 

Nunc vectus alâ praepetis ingenî,

 

Vatum beatos sollicitas choros;

 

Nunc voce facunda disertus

 

Attonito loqueris Lucaeo.

 

Mox erudito das Venetûm patri

 

Chartas Philippi, & fluctibus Adriae

 

Infers Batavorum labores,

 

Et veteris monumenta mundi.

 

Augusta nescit mens spacio capi;

 

Quocunque laudum fervida vis vocat,

 

Grassatur audax, impetuque

 

Insequitur generosiore.

 

At cuncta blandae fama modestiae

 

Momenta honorum transilit, & novos

 

Doctrina successus decenti

 

Dissumulat pudibunda vultu.

 

Beate Vorsti, Palladij decus

 

Diffunde regni; & Celtica dum petis

 

Illustris arva, vorticoso

 

Insinua titulos Garumnae.

 

Ne docta Rheni pignora Sequanae

 

Cedant alumnis. Laxius explica

 

Laudum theatrum, nec tribuli

 

Sufficiat placuisse Belgae.

 

Sic Leida iactet Vorstiadem suum,

 

Sic tanta Fratri gaudia divide,

 

Sic AElium repone terris,

 

Et patrio cineri parenta.