Poemata

In obsidionem urbis Bredae.

NVper Nassovius sterili me cespite captam,

Custodem Batavi fecerat esse soli.

Nunc Ligurum Princeps vivo me cespite clausam,

Custodem Batavis invidet esse meis.

Victrix gleba fuit, sed mortua; vincere iam me

Altera congesto robore gleba parat.

Fortunae fuit illud opus, fraudisque Pelasgae,

Nunc propriae fraudis conscia Marte petor.

Experiar, num Marte dolus, fortuna labore,

Ingenium forti sint potiora manu.

Si vincam, veteres dicar vicisse triumphos,

Quamque mihi laudem fraus dedit, arma dabu[...]

Si vincar, precio vincar maiore, nec, urbis

Qui validae fallet moenia, Tiphys erit.

Explicat Austriacas ultrix Hispania vires,

Et cunctas in me prodiga fundit opes.

Sic mercatur Iber. qui, si non pellitur, urbem,

Quam Batavis peperit cespes, habebit inops.