|
| |
Ad Clarissimum Virum Arnoldvm Bvchelivm, Advocatum Vltrajectinum, in Huberti Goltzij libros de Vitis Caesarum ex numismatis Romanis restitutis, Hendecasyllabi.
VVltus AEneadum, duces Quiritum,
Stantem curribus, essedisque Romam,
Et Romae dominos, & illa prisci
Secli nomina, Romulique stirpem,
Nobis Goltzius exhibet videndos,
Tu praebes mihi, Bucheli, legendos:
Devotasque animas perennitati
Transcribis mihi, lege non loquendâ.
| |
| |
Specto Iuliaden, verenda qualis
Dictator tulit ora, vel remissâ
Obnubit caput infulâ sacerdos.
Agnosco phialasque laureasque,
Et stellas, aquilas, decempedasq́ue,
Vexillum, capedunculas, aratrum,
Cultros cum lituis, faces, patellas,
Vrnas, pilea, Flaminum secures,
Et quaecunque sibi poposcit augur,
Et quae promeruit sibi triumphans.
Hic cernas patriae decus parentis,
Cernas indigetem, suosque quali
Deducat genitore Caesar ortus,
AEneae, Venerisque matris ora,
Seu victrix fuit illa, sive felix,
Seu malit Genitrix Deûm vocari.
Luget Gallia perditis trophaeis,
Lugent Teutones, & pater bicornis
Romanas vehit invidus cohortes.
AEgypto domitâ ruunt carinae,
Et frendet Crocodilus, ampla Nili
Rostris ostia permeat Viator.
Vltor Brutus adest, trucesq́ue sicas
Ostentat Latio, comesq́ue Cimber
Tollit pilea fascibus receptis.
Indignor caput improbum ferocis
Antoni, Lepidusque me triumvir
Plus vultu reficit gravi, decoro,
Dum victor domat Asturas superbos,
Exarmatque Tagum, ferumque Baetin,
Aut grandi sedet altior caballo.
| |
| |
Aut curru dominam pererrat urbem,
Aut vastos regit imperator Afros,
Aut saevi exuvijs furit leonis.
Risi tergeminas sodalitates
Antoni, Lepidique, Caesarisque,
Non hostes satis, aut satis benignos,
Non charos satis, aut satis malignos,
Nec iunctos benè, nec malè potentes.
Vibrant Armenij graves sagittas,
Vincit Ventidius, duplexque serpens
Hinc illic capiti imminet, viroque.
Iungit castra manus, fides maniplos,
AEgyptum Latio; sereniores
Expandit mulier superba vultus,
Et sculpto Cleopatra fulget auro.
At tu, qui titulis Deûm triumphas,
Vatum grande decus, decus iuventae,
Iam Consul toties, tribunus, augur,
Divi nate patris, trophaea prisco
Octavî tua colligis metallo.
Iam Trinacria, iam subacta Memphis,
Victrices tibi consecrant figuras,
Sacrat Bilbilis ipsa, Cantaberque,
Et qui signa gerit reducta Parthus.
Te Germanice posteri loquentur,
Dum Chaucos, Frisiosque, Saxonasque,
Catthos subdis, & impigri Visurgis
Accenses spolijs tuis pharetras.
Sub te Rhenus arundifer recumbit,
Lugent Vindelici, novisque victi
Praebent praemia pineam triumphis.
| |
| |
Aras intueor, bases, columnas,
Cippos, quercea serta, tot quadrigas,
Deductos peregrè tibi colonos,
Taurorum iuga, quosque Graecus, Afer,
Europaeque Asiaeque laetus orbis
Sculpendo tibi nuncupant honores.
Cedunt arma togae, ferocientem
Claudunt templa Deum, tuosq́ue felix
Ostendit mihi Capricornus ortus,
Ac lauri tibi militant perennes.
Mox fastos mihi Consules recludunt,
Et quae Caesaribus priora seris
Currunt secula, temporumque fasces,
Gallos, Semproniosque, Claudiosq́ue,
Pictores, Rutilosque, Iuniosque,
Flaccos, Posthumios, Atiliosque,
Fortes Scipiadas, Paterculosque,
Cottas, AEmilios, truces Metellos,
Et claros domitis duces Faliscis,
Et claros Siculis duces subactis,
Captisque Insubribus duces ovantes,
Et victum Fabio morante Poenum,
Pressis Sardibus inclytum Mathonem,
Imbelles Ligures, Getas, Cethegos,
Et Gracchos querulos, graves Catones,
Mixtosque omnibus alites galeros.
Quid Drusos referam? quid Africanos?
Pisones, Curiosque, Cassiosque,
Scauros, Caecilios, Papiriosque,
Et capto Marium ferum Iugurtha?
Quos ne dicere singulos laborem,
| |
| |
Quotquot Romulidum duces fuere,
Quotquot Goltzius exhibet videndos,
Tu praebes mihi, Bucheli, legendos.
|
|
Auteursrechtvrij