|
| |
| |
| |
In Palaemonem, Sive Diatribas Scholasticas Clarissimi, Doctissimique Viri, Theodori Schrevelii Rectoris Scholae, quae est Lugduni in Batavis.
REctor Iuventae, ductor efferae gentis,
Scientiarum multiformium doctor,
Et arbiter perite disciplinarum;
Potens docendi, quum docentis ex ore
Ignara pendet palpitantium turba;
Potens monendi, quum monere te poscit
Recalcitrantum dives aula Cyclopum,
Et insolentis improbus furor secli:
Quis hic serenae pulpitum quatit famae
Novus Palaemon? porticusque doctorum,
Et perstrepentes maximi lares Phoebi
Redonat orbi? quis puertiae primos
Castigat annos? traducesque dilectos,
Parentiumque tot propagines laetas,
Semen Batavum, patriae renascentis
Perenne germen, spemque gentis invictae
Sub iura cogit, & rebellis orchestrae
Retundit ausus? pandis ora, Schreveli,
Diserta Rhetor, & scholasticum Belgis
| |
| |
Regnum reformans, sceptra paedagogorum,
Trepidosque fasces, & tribunal augustum,
Totumque coetus litterarij circum
Legum catastis, vinculisque constringis.
Hic oscitantum naenias magistrorum,
Hic imperitos commatum latratores,
Ineptiarum serios rogatores,
Scabrasque voces, & superba fastidis
Elementa vocum, ludicrosque natales.
Hic sparsa latè regna Grammatistarum
Arctas ephebis, dogmatumque congestos
Purgas acervos. hic nepotibus diram
Ferocientis Orbili dicam scribus:
Corylisque lentis, frondibusque nodosis
Praefers minacis acre iurgium frontis.
Hic Tulliastros verba more mendici
Ferruminantes, sordiumque priscarum
Quasi ostiatim luridos petitores,
Reos lacessis: hic rudes soloecismos,
Fecesque Evandri, Rhetorumque tot morbos
Arces Lycaeis, puriorque praefaris.
Hic eruditae pubis impigros gressus
Vrges triumphis, laudibusque suffulcis
Avara famae pectora, & facem subdis
Virtutis oestro. torpidas pudor mentes
Incessit atrox, seculique despectum,
Vivumque rerum nescijs parat bustum.
Hic foeta vitijs, induit repurgatos
Natura vultus, & docentium curis
Gaudet renasci, ne profana stribligo,
Illiterata mens, proterva vecordem
| |
| |
Analphabetis vita reddat aetatem;
Interque coetus semifaeminatorum,
Inersque vulgus langueat veternosa.
Quid prisca iactas Orpheum tuum Thrace
Flexisse tigres, amniumque veloces
Stitisse fluxus? horridas Hebri vatem
Stupuisse rupes? hic tigres Batavorum,
Rabidumque pectus fervidae iuventutis,
Osque illud audax, & iecur leoninum,
Furiasque docta voce mulcet orator.
Quid sponte grandes credis erigi Thebas,
Cantuque flecti lubricum pecus Nerei
Excors vetustas? quid laboribus fictis
Alcmena natum laureâ poëtarum
Superba donas? sordibus repurgatum
Stabulum tyranni, saeviensque Stymphalis,
Et pullulantum foeta Lerna monstrorum
Scholae fuere, agrestiumque pugnaces
Iuvenum palaestrae, flagitique foecundae
Sodalitates. Tu Batavus Amphion
Has condis arces urbiumque praemunis
Virtute portas. Tu renatus Alcides
Hydras fatigas, & potente doctrina
Nessum trucidas, frangis ora Centauris,
Et versipelles arte subdis Antaeos.
Per te aleator, improbusque scortator,
Periurus, exlex, coelitumque contemptor,
Et fastuosus, publicusque grassator,
Et qui superbas inflat impotens buccas,
Et qui bibaci vina gutture eructat,
AEris paterni, nominisque decoctor,
| |
| |
Et quicquid usquam criminum atque monstrorum
Perdit venustum impuberis decus vitae,
Mundo fugantur. Sanctitas, fides, candor,
Sororiansq́ue Veritas fatiscenti
Redduntur aevo. Tu velut mari magno
Flectens carinam Tiphys ocium fesso
Donas ephebo, iam vigil truces ponti
Diffringis aestus, & minis procellosum
Componis aequor, mox severus obstantem
Hellen flagellas, exuisque Neptunos.
Vir magne, cuius insidens labris regnat
Vis tanta fandi, quo nec alter hoc coelo
Aut iussa dictat rectiora cirratis,
Aut verba balbis aptiora praemandit,
Sive explicatos Rhetorum sinus pandis,
Seu sensa vinclis contrahis Stagiraeis,
Vel in recessus grandium poëtarum
Doctor recedis: Iam Palaemonem Belga
Audit loquentem. Dumque gymnasi priscos
Evolvit ortus, regibusque calcatos
Legit penates, atriumque Pelidae,
Sublime maiestatis arduae limen
Veneratur ultrò, & fascibus tuis charos
Subdit Quirites. Ipse vocibus doctis
Recoctus infans, iamque plus sibi notus,
Fidem Tonanti, lumen ingeni famae,
Consulta Patriae, verba commodat rostris,
Seque esse gaudet, qualis haud potest nasci.
|
|
Auteursrechtvrij