|
| |
| |
| |
Ad generosissimum, praestantissimumque Virum, D. Lavrentivm Reael, rerum Indicarum nuper in India Orientali Praefectum, nunc Matheseos studijs Vltrajecti vacantem.
VIr magne, cuius dexteram calens pavit
Eous orbis, fervidoque supposta
Imperia Phoebo, cuius Occidens ductu
Latè potentis fregit arma Castellae:
Quem fama belli, Martijque conatus,
Tidora supplex, Cantaberque depulsus,
Totiesque Belgis impetita Ternate
Vexere coelo, quà latus per Arctoum
Delapsus Indus exteras rates vectat,
Gangesque lato Bengalae sinu latrat:
Iam pacis almae cultor, & procul fusi
Satur cruoris, exilîque maiorum
Laudatus ultor, victimis Iberorum,
Patriae, tuisque plus satis parentasti.
Post bella Phoebum, barbarasque post caedes
Cyrrham capessis, & furore Mavortis
Tandem expeditus, subdis ocio Martem,
Hastam Camoenis, pileoque commutas,
Placidaque olivâ lauream triumphalem.
Non iam tremendus vindicem Moluccarum
Ensem coruscas, nec tuas Batavorum
| |
| |
Curas lacessit miles, aut minax classi
Instat Malacca. rapta Cantabro regna,
Victum cubile Solis, aequor Eoum,
Tuaeque laudis spatia vasta metiris.
Non iam superbas Amstelî fori gazas
Bellator auges, scrinijsque mercantum
Infers avarae dulce pabulum mentis.
Non ventricosas mercibus rates lassas;
Non foederatas regibus manus iungis;
Valloque castra cingis, aut struis muros.
Quid Banda vectet, auribusque protentis
Malbaricus hospes, Borneumq́ue securus.
Stellata mundi templa, siderum lapsus,
Ortusque rectos, & tueris obliquos.
Deûm penates iam placere coeperunt,
Cui domita tellus, quaque parte terrarum
Emergat Arctos, occidatque, vel rectus
Volvatur orbis, aut moras tenebrarum
Titan adaequet lucibus, vel extendat,
Scrutaris, alti municeps novus coeli.
Quae causa priscis astra sedibus trudat,
Cur Spica fugiat Virginem, & minans cornu
Medio remotus orbe frigidum spectet
Aries Booten, cur suos trahat currus
Borealis AEthon, plusque pellat Australis.
Vt axe in isto, quo ferox Ducem sensit
Iberus, umbra dextra, vel sinistrorsum
Flagellet aestum, bisque torreat fruges,
Bis altus ipsum verticem premat Phoebus:
Quater quadrigas sistat; & dies nocti
Describat aequos; luminumque tot vultus,
| |
| |
Attollat omnes, & mari lavet coelum.
Quot vasta sese terra passibus pandat,
Vestigat animus, aut quibus sagax China,
Feraxque Timor santali, vel Ambona,
Spatijs Batavo distet orbe metitur,
Discitque inermis, quae subegit armatus.
Haec ipsa certè docuit accolam Nili
Chaldaeus Abram. norat ista coelorum
Librator Atlas, Herculesque suffectus.
Hac involutos arte temporum fastos
Caesar recudit, & novum decus sceptris
Aphonsus addit: barbarosque crudeles,
Tenebricosos Cynthiae notans vultus,
Flexit Columbus, quosque contumax Indus
Cibos negabat, eruditus extorsit.
Hac arte mundi suspicis creatorem,
Lustrator operum, machinaeque solertis,
Quantumque possit numinis vigor summi
Nutu potente, mens quieta perdiscit.
Vices beatae. ter quaterque felices,
Quae te serenis hospitem Camoenarum,
Divaeque templis reddidere doctrinae.
Quam vita dispar, disparesque iam curae
Pectus fatigant, spiritumque Bellonae
Furias perosum, & saeva iura Mavortis,
Vel Archimedi mancipant, vel Euclidi.
Qui castra nuper, militemq́ue lunari
Clausum figurâ, circuloque direxti,
Impune circos, angulosque iam formas
Levi papyro, & ficta castra depingis
Dux incruentus. qui suëtus armatam
| |
| |
Numerare gentem, filiosque Neptuni,
Quot Vrsa stellis, Pegasusve coelesti
Micent theatro supputare iam gaudes.
Nec trux machaera, fulminansque balista
Profligat hostem, circinos rotat dextra,
Quae strinxit ensem, perticaeque chartarum
Se dissecantes arte dirigunt sulcos.
Sphaeram volutas, hostiumque tot tractus,
Goam potentem, vasta regna Sinarum,
Ditesque Iavas: quasque adire non sivit
Hispanus oras, tutus undique adspectas.
Sic fama duplex posthumum vehet nomen,
Patriaeque Mavors te sacrabit, & Pallas.
Quantumque vires horruit tuas Baetis:
Defensa quantum vindici suo debet
Eoa tellus, insulaeque non victae:
Batava tantum, plusque terra debebit
Bellonae alumno, praestitique Musarum.
|
|
Auteursrechtvrij