Poemata

[p. 124]

In Mausoleum Gvilielmi Avransiorvm Principis, quod Delphis visitur.

ADspice Nassovij saxum regale sepulchri,

Quisquis ad Auriaci nomen, & arma stupes.

Haec memor Austriacum patria indignata Philippum,

Erigit Auriaco posthuma busta suo.

Surgit in invidiam pulsis hoc marmor Iberis,

Seraque virtutum praemia Belga parat.

Lustra oculis spectator opus, vultusque pererra,

Quos labor, & solers sculpsit in aere manus.

Guilielmi cineres, & magni Principis umbram,

Cunctaque nostrorum funera terra capit.

Incubat Auriaco Auriacus, sed eburneus illi,

Qui priùs Albanum terruit ense Ducem.

Sic iacuit dira stratum mercede cadaver,

Cum manus innocuum sterneret emta caput.

Cernis, ut insideat lapidi fortissimus heros?

Illa Patris patriae prisca figura fuit.

Talis erat, cum iura daret, cum vindice ferro

Solveret Hesperio Belgica colla iugo.

Suspice Pyramidum surgentes more colossos,

Hoc aeterna Ducum gloria culmen habet.

Vndique funestae fera Mortis oberrat imago,

Exuvijsq́ue suis imperiosa riget.

[p. 125]

 

Disce triumphantes Parcis succumbere dextras,

 

Armaque, sed fatis praeripienda, geri.

 

Stat Pietas, sacrumq́ue manu veneranda volumen

 

Gestat, & aethereas diva recludit opes.

 

Hoc Pietas Duce tuta fuit, potuitq́ue sub illo

 

Intrepidâ coelum relligione coli.

 

Stat iuxtà Herculeo circumdata tergore virgo,

 

Fortiaq́ue invicto pectora Marte gerit.

 

Hesperios sic ille Deos, & castra fugavit,

 

Et valida fregit Baetica sceptra manu.

 

Tu quoque propitio Libertas aurea vultu,

 

Hoc libertatis vindice, pulchra nites.

 

Parte alia adversum sceleratis exerit ensem

 

Iustitia, & laeva ponderat aera manu.

 

Talis Arausiades media inter praelia ductor

 

Asseruit Batavi iura verenda fori.

 

Vnaque dum Marti, Themidi manus altera servit;

 

Et geminos stricto vindicat ense deos.

 

Quaeq́ue per immensas fundat praeconia terras,

 

Vocales inflat Martia Fama tubas.

 

Hinc puer atque illinc lachrymis indulget acerbis,

 

Et dolet extinctas, quas gerit ipse, faces.

 

Diffluat in lachrymas, & acerbos Belgica planctus,

 

Dum subit extincti tristis imago Ducis.

 

Quis paria Hispano faciet? Tu maxime Fili,

 

Ne moriare prius, quam moriatur Iber.