Eximiae eruditionis viro, Qvirino à Cankebeer, cum in Academia Lugduno-Batava Iuris utriusque Doctor crearetur.
DVm natura suos effoeta recolligit ausus,
Fessaque nascendo tempora trudit Hyems,
Iamque suos abiens Autumnus damnat honores,
Et pudor est nudum veste videre latus,
Frigora dum gelidâ Boreas invitat ab Arcto,
Et laxat famulas languida bruma manus;
Ecce triumphales agitat Sapientia currus,
Egregiasque vices cum Iove diva facit.
Ipsa novos animos Pallas capit, ipsa labores
Explicat, & laudes virgo patrima suas.
Panduntur curarum aedes, panduntur honorum,
Vtraque, sed socio limine, templa patent.
Abditus ingenijs gliscit calor, ardor honesti
Inclyta magnanimae pectora pubis agit.
Vix transit sine vate dies. lux altera, rursum
Altera Pegaseas lassat honora Deas.
AEmula Battavicas virtus exercet Athenas.
Invidiam credo nomina magna pati.
| |
Qualis Olympiacae miratus praemia palmae,
Instat equus, si, quos occupet, ante videt,
Hunc alius super, atque alius sequiturq́ue premitq́ue
Et rapidis fervent concita plaustra rotis.
Viderat haec dudùm plaudentis signa Lycei;
Meque trophaea manent illa, Quirinus ait.
Ibimus, & si quis meritis locus, ibimus inquit,
Materies laudis sit Themis una meae,
Hac Minos, iustusq́ue Solon, hac arte Lycurgus,
Nec moritura meus nomina Caesar habet.
Hac Decius, Paulusque vigent, & maximus Azon
A serâ titulos posteritate refert.
Invenit mens docta viam. patet omnis eunti
Iustitia, & vastos explicat illa sinus,
Innumeras legum facies, & flexile verum,
Iuraque clamosi litigiosa fori.
Quid iuvet haeredem, quid spes eludat habendi,
Vt trepidi possit causa placere rei.
Quanta fides tabulis, & quali teste probentur,
Quidq́ue queat socios dissolüisse thoros.
Temperet ut iuris ratio decreta severi,
Quae maneat sceleri debita poena suo:
Cunctaq́ue Caesareis veneranda volumina sceptris,
Aptaq́ue bellantum litibus, apta togae.
Suspice Leida virum, & tantae da debita fronti
Praemia, ne proprium sit sine teste decus.
Ad te tota redit plenis spectata theatris
Gloria, communi semper honore meres.
Sunt tua, quae defers insignia; quaeque coronant
Tempora, sunt curae Pilea signa tuae.
|
|
Auteursrechtvrij