Poemata

Ad Doctissimum Iuvenem, Hvgonem Boxelivm, Cum Magister Artium publicè in Batavorum Academia renunciaretur.

DVm patrios circum frendet Bellona penates,

Iamque minax etiam Breda nocere potest;

Dum resonant medijs Mavortia classica portis,

Et rediens belli praemia iactat eques:

Otia, Boxeli, & Batavi secreta Lycaei,

Et studium placidae nobile pacis amas.

Phoebus amor tuus est, faciles solatia Musae,

Saevaque dum damnas praelia, docta paras.

[p. 109]

 

Succubat exutus titulis fallacibus error,

 

Et verum specie iam meliore nitet.

 

Ingreditur prisco Graiûm sapientia fastu,

 

Et sua purgari dogmata Stoa stupet.

 

Docta Cleantheam lassat solertia turbam,

 

Socraticasq́ue vigil cura reformat opes.

 

Sic patriae vixisse cupis, sic aspera bellis

 

Ingenio fiet mitior Heusda tuo.

 

Audiet Odrysius tenerae praecepta Minervae,

 

Nec rigidâ solùm casside tutus erit.

 

Audiet indomitus tanti documenta magistri,

 

Atque tuâ mores leniet arte suos.

 

Illic innocuo si pinges pulvere vallos,

 

Fictaque dimensis castra locabis agris:

 

Ipse suum perdiscet opus. si moenia scribas,

 

Exstruet auspicijs moenia scripta tuis.

 

Si lasciva truces victoria suggerat iras,

 

Et iugulum victus porrigat hostis Iber:

 

Parcere subiectis & se superare docebis.

 

Nec uisi pugnantûm gloria sanguis erit.

 

Praelia si timidi fugiant, hortabere dictis;

 

Fervida si tentent praelia, iussa dabis.

 

Iam patris AEneae laudes, nunc Hectoris arma,

 

AEmathioque canes bella peracta solo.

 

Vel quibus Ausonios Cattus spoliaverit ausis,

 

Spreverit & Latios Belgica terra Deos.

 

Omnia doctrinae parent sub legibus. ipsos

 

Bellorum fas est subdere colla duces.

 

Formant arma Scholae: nec Martia Palladis hasta

 

Negligit officij discere iura sui.

 

Crescite Battavicae tantis vittutibus urbes,

[p. 110]

 

Et galeas Clario condecorate Deo.

 

Si neget aeternos belli fortuna triumphos,

 

Continuant vestrum pulpita nostra decus.