Poemata

Ad eundem Sponsum urbi Bergae ad-Zomam nuper obsessae à consilijs.
Epigramma.

EFferus obsessas nuper dum Spinola portas

Pulsat, & hoc laudum pulvere sudat Iber;

Dum sibi dux Italus, sibi spondet Berga triumphos,

Miscet & alternas hostis, & illa neces:

Mitteris, ut tanti libres discrimina belli,

Et patriae casus mens generosa levet.

Dumque libens gladijs, cuneisq́ue immixtus inerras,

Nulla tibi curae virgo, Venusq́ue fuit.

Mox ubi cessit Iber, Veneri quoque cedis amator,

Raptaque Mavorti praemia Cypris habet.

Debellat rabidum felix solertia Martem,

Attamen haec Veneris succubat una manu.

Scilicet invitos Mavors subit, illa volentes,

Haec precibus causam promovet, ille minis.