Poemata
(1628)–C. Barlaeus–
Auteursrechtvrij
[pagina 95]
| |
Carmina Barlaei signa futura tui.
Forsitan Oceani, forsan fastidia terrae
Discutiet vatis charta notata manu.
Aut placidos inter relegens haec disticha fluctus,
Adspicies famae scripta trophaea tuae.
Quin etiam, veteris si fas meminisse magistri,
Hos elegos medijs pignus habebis aquis.
At vos AEolij fremitus compescite fratres,
Ne violet charum dira procella caput.
Qua vehitur meus ille rati, servatur Apollo,
Depositumque poli nobile puppis habet.
Cui sua Phillyrides, Amythaoniusque Melampus,
Cui sua Pergameus credidit ausa senex.
Sacraque praeclarus pandit consulta Machaon,
Et veteres Graiûm terra reclusit opes.
Parcite bellaces Morini, dum transeat hospes,
Nuncupet & patrijs debita vota focis.
Innocuae repetunt Brittonum littora Musae,
Nec manus Hesperij sanguinis ista rea est.
Cur noceant placido belli solennia Phoebo,
Martiaque imbelles exigat ira viros?
Non onerant nostras Eoa monilia dextras,
Fulva nec aurifero pondera rapta Tago.
Doctorum fatale malum sat parvula dos est,
Pauperiesque bonae mentis iniqua soror.
Audiat Austriacus; debentur libera nobis
AEquora, nec Pallas partibus aequa studet:
Audiat Auriacus: scelus est vincire Camaenas,
Hic speciem Mavors impietatis habet.
At tu laeta tuum generosa Britannia civem
Excipe, Battavicae nomina prima scholae.
| |
[pagina 96]
| |
Quales Cecropijs redeuntes Roma salutat
Sedibus, & plausus commodat ipsa suos.
Si caruisse dolor fuerit, matura rependet
Consilia, & celeres protrahet arte colos.
Opprobrium fatis faciet, nëc vindice tanto
Negliget in leges Atropos ire novas.
Morborum genus omne potens Medicina fugabit;
Quos Tamesis refluis in mare mittet aquis.
Sic ubi Tarpeias serpens Epidaurius arces
Appulit, afflictâ cessit ab urbe lues.
|
|