Poemata

[p. 91]

Ad doctissimum Iuvenem, D. Ioan. de Ionchere, De Publicis Ivdiciis Pro consequenda summa Iuris utriusque Laureâ publicè disputantem.

AVrea cum primis flueret mortalibus aetas,

Laetaq́ue Saturno secula rege forent:

Candida simplicitas teneris eluxit in annis,

Nec sceleri Iudex, aut gravis ultor erat.

Ignorare suas voluit facundia laudes,

Nec fuit in trepidos lingua diserta reos.

Curia tunc strepitu, tunc aures lite vacabant,

Et nondum cupidas senserat aula manus.

Non Tabulae scripsere minas, poenasve Decemvir,

Vinxerat aut sontes saeva numella pedes.

Mox ubi sub duro mores riguere metallo,

Coepit & adversa crescere lege nefas:

Curia, rostra, forum, carcer, vadimonia, lictor,

Nomina temporibus nata fuere malis.

Ilicet iratae Metium rapuere quadrigae,

Subditaq́ue infami colla fuere iugo.

Iura dedit populis posito vix praetor aratro,

Et poterant lapides, & placuisse fabae.

Signantur presso miserandae stigmate frontes,

Bestiaque in poenas saepè vocata fuit.

[p. 92]

 

Aut damnata truces expectant corpora Scalae,

 

Clauditur aut Gyaro femina virque brevi.

 

Hunc celeres torsere rotae, & crudelibus uncis

 

Rapta fuit medio purpura spreta foro.

 

Vibravit rigidas Manli censura secures,

 

Fasciaque in iugulo stricta Cethege tuo est.

 

Exulat, & poenas Naso persolvit Amori,

 

Et potuit vates versibus esse miser.

 

Atque alibi celebres dictant consulta Lycurgi,

 

Et vitijs scribit verba severa Solon.

 

Improbitas irata dolet, legumque catastas

 

Horret, & ultores credit adesse Deos.

 

Haec Batavos, Ionchere, doces, sociosque Sicambros,

 

Et patriae praestas sceptra tremenda tuae.

 

Nec tamen aut duri laudas Busiridis aras,

 

Aut saevum Phalarim, Tantalidasque probas.

 

Temperat Ausonias facilis Clementia leges,

 

Et tua delicto est credita poena minor.

 

Debeat excellens alijs sua proemia virtus:

 

Per te securis non licet esse malis.