Poemata

[p. 63]

Elegia ad Christvm in cruce pendentem, ad Reverendiss. doctiss.q́ue virum D. Arnoldvm Bvchelivm Iurisconsultum, & Advocatum Vltrajectinum.

DOcte senex, quae sacra fero, cape federis arrham,

Quam meus è casto pectore mittit amor.

Non scopulo fixam Andromedam, poenasque Promethei,

Hippolytiq́ue obitus, raptaq́ue membra leges.

Non Tityi iecur, aut rapidos Ixionis orbes,

Titanumq́ue graves, Enceladique vices.

Illa meis aberunt Vatum mendacia chartis,

Exhibet afflictum pagina nostra Deum.

Si qua tibi tulerint humiles solatia Cunae,

Discutiet cunctos Crux veneranda metus.