|
| |
In Obitvm Clarissimi Viri, & Mathematici incomparabilis, Willebrordi Snellii Matheseos in Academia Lugduno-Batava Professoris, Epicedivm.
XV.
QVae nova sidereos abscondunt nubila vultus?
Cur facies mutata poli est? mundi ne fatiscit
Machina? & aethereis orientia signa maniplis
Fatales metuunt obitus? num pristina coelum
Improbitas facit esse reum? rursumque rebellis
Terra fuit, Tityusque ferox irascitur astris?
Stellarum cur languet honos? retroque iugales
Phoebus, & attonitos perterrita Cynthia currus
Raptat, & ardentes trepidant formidine flammae?
Pallescunt cuncti Snelli cum manibus ignes,
Et Superi sua damna dolent; Atlante remoto
Astra timent. primi Boreae sub parte Triones
Permiscent pelago lachrymas: vicina Bootes
| |
| |
Plaustra fugit, pavidoque Helices custodia pernox
Negligitur, radijsque Draco levioribus ardet.
Ipsa Ariadna suos capiti subducat honores,
Gnosiaque Arctoae decedat stella Coronae,
Sed vetat Arctophylax. medijs Ophiuchus in astris
Contrahit ingentes humeros, & segnius Anguem
Continet hîc illîc manibus: moerore solutus
Scorpius invisae condemnat vulnera caudae.
Excutit exuvias, & victi terga Leonis
Engonasis, turbatque Lyrae modulamina Vultur.
Moeret Olor, cantatque melos iam flebile, quale
Ad vada Maeandri fatis instantibus olim
Praecinuit lugubre sibi. Tuque optime recti
Arbiter, & Themidis custos sanctissime Cepheu,
Stamina Parcarum repetas, ni numina summi
Plus timeas veneranda Iovis. planctura decoras
Tendit Cassiopeia manus, nec fulgida longè
Andromede excussâ plorat nova funera pallâ.
Non solitus vultu candor nitet, emicat ore
Antiqui luctus facies, cum brachia monstro
Panderet, & rigidae vincirent membra catenae.
Adstat Equus, guttisque humectat grandibus ora
Pegasus, & iuxta lachrymantem Persea spectat.
Frendet Erichtonius, nec lugens amplius hircum
Ferre potest humeris. obtusa cuspide Telum
Labitur, Antinoumq́ue Aquilae dolor improbus urget.
Iamque suis iterum vellet Delphinus in undis
Mergier, & spatio maiore Triangulus optet
Posse capi, vitiatque poli sors ista figuram.
Ast Aries cunctos inter venerabilis ignes,
Sede sua locat indigetem: quà circulus alti
| |
| |
Solstitij mediam populis disterminat aethram,
Ingentesque habitant animae, cum Caesare magnus
Sosigenes, stellisque suis permixtus Aratus,
Alphonsusque senex, & Cimbrûm maxima Tycho
Gloria. tota trucis mugit vicinia Tauri,
Pleiadesque laetent, & cum suspiria fundunt,
Electram soror Alcynoe, Meropemque Celaeno,
Taygetam Asterope & Maiam solatur amicè.
Quin Geminos dolor vnus habet, subit ille Leonem,
Chelarumque minae fracto iam robore languent.
Virginei squallent habitus, & longius Arcton
Spica fugit, bustumque viri: divortia mundo
Libra facit, trutinaeque aequalia pondera iamnunc
Despicit. at tensum Arcitenens dum surgit ad arcum,
Intentat telum Lachesi. natalibus iste
Principis Augusti celebris Caper, ingemit umbrae,
Et sua perculsus Ganymedes pocula fundit,
Piscibus Oceano mersis. Dic caetera nobis
Vranie, quosque Auster habet declivior ignes.
Hic timidum videas nimbosi Orionis ensem,
Lapsaque scuta manu: fugiunt Procyonque, Lepusq́ue,
Quique furens urit sitientes Sirius agros.
Hinc Cratera ferens Corvo discerpitur Hydra
Acrius. Ecce pius Chiron, praeceptor Achillis,
Fortius adversum (dolor huic exasperat iras)
Transadigit mucrone Lupum. Iamque omine laevo
Thuribulum tristes ratibus denunciat Austros,
Velaque & extensos rumpit ferale rudentes.
Est etiam sub ventre Capri semotus ab Arcto
Piscis, & effusas iam largius imbibit vndas,
Tristitiae documenta suae. Titanius ales
| |
| |
Hunc iterum flammisque suis atque igne renasci,
Et veteres reddi, seclis redeuntibus, annos
Gaudeat. At totum terret clangoribus orbem
Infausti Palamedis avis. Nereia Pistrix
Andromedam trepidare vetat, sociataque Tauro
Illaesum sinit esse bovem. Phaethonta superbum
Fleverat Eridanus; nunc, qui ratione magistrâ
Flammiferos direxit equos, coelique meatus
Noverat, has ipsas latè defletur ad undas.
Non rota praescriptos Ixionis occupat orbes:
Tardius Argolicae subeunt aplustria puppis,
Laesaque languidulis Argo stat pallida remis.
Tiphys abest, docuitque ipsum qui tendere vela
Tiphyn, & incautis monstravit sidera nautis,
Heu, fuit, atque vltrâ Batavam non dirigit Argon.
Haec Superos fortuna manet, nec nescijt istos,
Quà radio vastum descripsit gentibus orbem,
Inferior Natura obitus: dumque atria plangunt
Attica, Cecropidumque scholae, praeclara Canopo
Memphis, Arabs, paribusque Afer felicior horis,
Quaeque levat fessos Phoebi Carteia iugales,
Occiduae Gades, Atlanteique recessus,
In Batavis longo stupuit Facundia luctu.
| |
In ejusdem obitum Epigramma.
SIdera quae pernox, aeternaque lumina mundi,
Et didicit totum mens studiosa Iovem,
Iam propius visura Deos, Divûmque penates,
Odrysios sub se, Mercuriosq́ue videt:
| |
| |
Stellarumque alios vultus miratur, & ignes;
Totaque spectanti machina facta nova est.
Non dolet ingrato foedari vespere coelum,
Praecipitemque alto labier axe diem.
Oceano nusquam mergi, vel surgere Solem
Adspicit, aut tantum delituisse iubar.
Quin stupet ipsa suos nusquam se cernere Belgas,
Cunctaque sub puncto regna coire brevi.
Non illic rabido fervens Canis aestuat ore,
Aut nocet inviso Parrhasis ursa gelu.
Non dextrum ferit umbra latus, non ulla sinistrum;
Omnia spectantur sidera, nulla latent.
Non hic Eoae Atlantides absconduntur,
Humidaq́ue Autumnos Pleias orta facit.
Non levis effusas occultat Aquarius undas,
Aut latitant istis Gnosia serta locis.
Astra meant pariter, nec Tauro Scorpius exit
Rectior, aut Cancro lentius AEgoceros.
Cynthia sub pedibus magno cum fratre quadrigas
Flectit, & hîc rectum Signifer urget iter.
Nusquam stat librata dies, nec splendida nocti
Lumina Phryxaei velleris aequat ovis.
Sic discit perijsse sibi, quas scripserat, artes
Snellius, atque alijs legibus ire Deos.
Sed veri satur ipse Dei iam vultibus, artem,
Quam docuit, tanti dedidicisse putat.
|
|
Auteursrechtvrij