|
| |
| |
| |
In Rectoratum, sive Praefecturam Academicam Clarissimi viri Petricvnaei, Iurisprudentiae in Batavorum Academia Professoris celeberrimi.
XIII.
QVis Deus Auriaci clarissima sceptra Lycaei,
Et tantum tibi credit onus? dum Delphica fasces
Assignant responsa novos, & praescia fati
Destinat imperijs tacito cortina recessu?
An, velut Eoas Medo concessit habenas,
Infremuit tibi laetus equus, fallaxque caballus
Augustum monstravit iter: vel fixa parenti
Oscula Palladijs sacrarunt nomina regnis?
Num bello tibi partus honos, vel vindice dextrâ
Hos titulos fortuna dedit? num fascibus haeres
Succedis, proavûmque capis moderamina rector?
Praeficeris Phoebi laribus, dominumque salutat
Te supplex doctrina suum; nec iussa minorum
Exequeris protrita Deûm. quin iudice regnas
Nassovio, tantique Ducis mandata capessis.
Scilicet assertor patriae, terrorque Philippi,
| |
| |
Neptunum, Vestamque domans, dum classibus aequor
Vindicat, & dubij librat discrimina belli,
Pieridum procurat opus, Martiq́ue ministrans
Expendit momenta scholae: quò praeside in uno
Battaviae stet tuta salus, nec faeda triumphet
Barbaries, placidasque ferox exterminet artes
Odrysius, rudibusque ruat facundia castris.
Insedit labor iste Ducem: geminisq́ue Batavi
Vincimus auspicijs; & dum manus altera ferrum,
Altera Cecropiae versat consulta Minervae,
Arcetur malesanus Iber, securaque tollit
Pilea, & armorum captat solatia Belga.
Heu Pandioniae Musis patuistis Athenae.
Doctorum fecunda domus; subversa Cleanthis
Atria, Socraticique lares. mox prisca potentes
Eloquio rostris donavit Roma Quirites,
Et Latij laus ista fuit. migrastis & illinc
Aonides, sociaque vagus cum Pallade Phoebus
Constitit in Batavis, profugas ubi Leida Camaenas
Excipiens, placida tutas in sede locavit.
Sunt regnis studijsq́ue vices, pariterque curules,
Et Musas sors caeca premit. Tibi laeta secures
Iam defert Schola nostra suas, eademque potestas
Bis concessa viro, bis laudatura regentem,
Evehit, & dominum claris praefecit habenis.
Te rectore ferunt per amoenos Phocidis agros
Castalios undasse lacus: gavisa sororum
Atria felices tali moderamine fastis
Inscripsisse dies. tu doctae iurgia pubis
Frangere, tu fluctus, tempestatesq́ue futuras
Evitare sagax, facili sermone mederi
| |
| |
Tritonumq́ue minas poteras componere dictis.
Ac velut aequoreis prudens Palinurus in undis
Assidet intrepidus clavo, torquetque carinam,
Et decimis subducit aquis: seu fervida qualis
Laxat anhelanti moderator colla caballo
Automedon, calidae nunc contrahis ora iuventae,
Nunc sapiens laxas. nunc spernitur ira tacendo,
Et rabiem mora parva domat: nunc efferus horret
Iussa furor, vultusque timent responsa severi
Alcinoi, Lapithaeq́ue truces. Si sidera tentet
Enceladus, superisque Iovem detrudere regnis
Titanum fera corda parent, iamque ipsa vacillet
Maiestas augusta Deûm, trepidique Senatus
Regia, fulmineo audacem Typhoëa telo
Deijcis, & natos coelum rescindere fratres.
Non alium Latiae gradientem clarius arces
Conspexere ducem, quoties capitolia consul
Scanderet, & rigidae tremerent antè ora secures.
Te quoque, Apollinei generosa insignia regni,
Sceptra beant, decorisque micat regalis imago
AEmula. sunt Phoebo trabeae, subsellia, fasces,
Quique Deum testetur, honos. Tu pilea donas
Emeritis: tu sudatis das praemia curis
Arbiter, & claris precium decernis alumnis,
Palladiae tot iura togae. Tu iussa Senatus
Tranquillâ ratione regis, tantique superbum
Nominis officium, maiestatemque verendam
Dissimulas, vultuque premis tua sceptra modesto.
Advolat ad tantae totus praeconia famae
Orbis, & in Batavo nascentes littore Musas
Quaevis terra colit. veniunt, qui mustea Celtae
| |
| |
Pocla bibunt, quos mittit Arar, rapidusq́ue Garumna,
Velivolusque Liger, picti venere Britanni,
Quosque ferox longis abigit Germania bellis,
Pannonius, potorque Padi, Dacusque Gothusque,
Vandalus, & nobis iam mitia nomina Cimbri.
Dat dextram, iuratque sidem vicina Sicambrûm
Progenies, Frisiiq́ue, & qui ferus innatat undis
Toxander, pacemque tuis sub legibus optant.
Ipsa Palatinae maiestas debita terrae,
Proles celsa Ducum, sub te iam Praeside captat
Otia, & imbelles praeclaris artibus annos
Mancipat Heroum soboles. his pulpita turgent
Vultibus, Aonijq́ue lares: haec purpura fasces
Irradiat veneranda tuos. Sic regia sceptris
Parent sceptra tuis, mandataq́ue praelegis ostro.
Ecquis Thespiadas tali rectore sorores
Respuat? aut quando studijs meliora patebunt
Secula. quis vecors adeò, qui iungere tecum
Verba neget? cui victricem facundia palmam
Destinat, & priscos Hellas transcripsit honores.
Nam velut immensas lampas Phoebaeia terras
Illustrat, pariterque fovet, lumenq́ue coruscum
Vtilitate probat, titulis illustribus addis
Doctrinae documenta tuae: quas dirigis artes,
Ipse doces, sociasque tuis tot commoda curis.
Nonne vides quantis Academia laeta triumphis
Emicet, & pleno doctorum fama theatro
Prostet ovans, lambatque altum invidiosa cacumen
Gloria? Iam clarus Themidos delubra sacerdos
Ingreditur, queruliq́ue aperit spectante corona
Iura fori, laurosq́ue refert. Iam secta Galeni
| |
| |
Vadit iter laudum, & Coo solennia iurat
Verba Deo. iam quadriiugo Sapientia curru
Invehitur, vocisq́ue tuae suffragia sperat
Terrarum, pelagique sagax scrutator, & aethrae.
Quique salutiferam terris commendat Olympum,
AEthereosque sonos, & magni nomina Christi,
Sub tua signa venit. nunquam maiore Lycaeum
Proventu Batavis tot doctae pignora mentis
Edidit. in cunctas messis tua funditur urbes.
Excipit hunc trabeata domus; rostrisque disertum
Praeficit, ille levis castigat crimina vulgi,
Inque adytis, Superûm antè aras, oracula pandit,
Et coeli destillat opes. solatia morbis
Blanda Machaoniae praebet solertia dextrae.
Auspicijs haec cuncta tuis, haec voce reguntur,
Iudicijsque vigent, despectaque rursus Apollo
Signa levat. mox fatorum currentibus annis,
Palladios iterum spondent tibi sidera fasces.
|
|
Auteursrechtvrij