Poemata

[p. 88]

Praefatio in Epicedium sequens, Ad invictam bello & armis Svecorvm gentem.

GEns invicta malis, nec tot satiata triumphis,

Quos meruit Regis Martia dextra tui:

Gens Batavis sociata meis, cape foederis arrham,

Quam tibi plangenti nuncupat ore dolor.

Quem luges afflicta virum, lugemus eundem;

Et populos fati sors manet una duos.

Extulit hunc Sueonum tellus; nunc extulit Haga:

Extulit illa decus nominis, ista rogum.

Illa vices fandi dederat, dedit ista silendi:

Et, quae non dederat praemia, saeva rapit.

Illa sibi priscae repetens insignia famae,

Nos solum exuvias mortis habere sinit.

Quantum clara levi distat fortuna sepulchro,

Officijs distant, Tu, Batavusque, suis.

At nunc Belga canet, quos tu veneraris, honores;

Et tecum tumulo talia verba dabit:

Quem peregrina suis secrevit purpura Catthis,

Hîc iacet, Arctoi nobile Regis opus.