|
| |
| |
| |
In eqvvm Nobilissimi ac generosissimi Viri, Domini Godefridi de
Haestrecht poemation.
VI.
STat sonipes, dominique ferox subsellia portans,
Obsequium gravitate premit, famulumque laborem
Dissimulat fremitu. decorant generosa comantes
Colla iubae, quas in varios solertia nodos
Strinxerat, & multo mulier distinxerat auro.
Tum coni plus fulget apex, & vertice summo
Ornamenta micant, phalerataque tempora perflat
Adversi vis saeva Noti: miratur honores
Ipse suos quadrupes, tardoque superbia gressu,
Quam calcat, fastidit humum. ferit ungula pandum
Altius in se tracta femur: cervice recurvâ
Obliquat sibi fastus iter; non prona dehiscunt
Ora, nec indecori quassantur tergora motu.
Desine magnanimûm quondam generator equorum
| |
| |
Ostentare tuos Agragas: non Thessala tellus,
Quem componat, habet. sordent, quos Bilbilis alta,
Quos Arcas, celsaeque dabunt fastigia Nysae,
Aut celeres in bella Scythae. non Isthmia talem
Compita, & Elaeo currentem carcere vidit
Graecia, cum celeres sese effudere quadrigae,
Palmaque praecipites accenderet aemula currus,
Et flantes sublime duces. Hierone triumphans
Littus Olympiadum seros memoratur in annos,
Et clarum Therone fuit, Pelopisque nepotes
Victrices vexere rotae. Tu testis honorum
Vivis adhuc Alphaee pater; tu Psaumidis abdis
Palladia sub fronde caput: tu fessa caballis
Corpora lavisti toties, spumamque lupatis
Abluis, & calidae propinas flumina Pisae.
Pythius Archesilae doctis applaudit habenis,
Xenocratemq́ue stupet; nec magnum clara Megaclem
Fama silet, curruque ruunt Alcmaeone nati.
Scilicet illa tuis victricia tempora frenis
Invidit, Godefride, dies; nec Olympia tantum
Conspexit generosa decus: seu colligat ungues
Ad numeros, libretq́ue gradum: sive auribus adstet
Attonitus, feriatque solum temeraria crurum
Mobilitas, grandique tremat sub pondere tellus:
Seu minitis attendat heri: seu flectat in orbem
Corpora; seu laxo transverberet aëra loro,
Arvaque quadrupedante pererret inania cursu.
Huic Hiero cessisset ovans, & prisca Pelasgûm
Gloria, cessisset spatijs Pherenicus in amplis,
Ipsaque Pisaeam decerperet Elis olivam.
Hic bellator equus medijs in vallibus hostem
| |
| |
Hinnitu vocet, & cuneis sese arduus ipsis
Inferat, hic lituos, hic cornua rauca, tubasque
Audiat intrepidus; perque agmina, perque phalanges
Sternat iter, peditemque truci cervice superbus
Dissipet, & nudâ stratum conculcet arenâ.
Talis in adversos sumptis insignibus AEthon
Ibat ovans Rutilos: tales calcaribu armos
Penthesilea fodis, medios cum virgo per enses,
Et Danaûm per castra ruis. generosior ille
Magnanimam vectet Thamyrim, Volscamque Camillam,
Aut erepta iterum repetentem signa Camillum.
Hoc quoque virtutum latitant sub pectore formae,
Et laudum generosus amor; servansque decori
Insipiens natura sui est. hanc praemia recti,
Et promissa movent, venienti grata magistro
Vox matutinum fremitu Titana salutat,
Et tremula modò calce favet. capit ille furoris
Argumenta sui, instâque accenditur irà,
Et contemta dolet. rursum laudata superbae
Maiestatis habet speciem, frontemque serena
Pandit, & heroo testatur gaudia gressu.
Haec mihi Apollineum pleno de fonte liquorem
Excutit: haec sacrum mihi percutit ungula montem,
Nec vatem sitijsse cupit. Iam fabula facta est
Pegasus, & celsum tranans Helicona volatu
Bellerophon, nataeque istis sub calcibus undae.
Tu mihi Bellerophon tuus est, qui sufficit undas
Pegasus, & toto vatum me proluit alveo.
Quid magno terrae gremium Neptune tridenti
Percutis? & primos imis de manibus excis
Cornipedes? hunc aequoreis vicinior oris
| |
| |
Belga dedit, rabidumque suis virtutibus aequor
Induit, & belli spumantes indidit iras.
Non huic frena truces Lapithae, Numidaeque dedere,
Celtiberûmque manus; non defensoribus istis
Tempus eget. spernit phaleras, alienaque Rhenus
Nomina, nec Siculus format calcaria Brontes.
Ipse tibi Batavus tantae redimicula frontis
Praebet, & excelso tumidas in vertice cristas,
Fulgentemque gravi succinctam pectore zonam,
Textaque in extremos velamina pendula talos.
Si spatium fors terra neget, sessore magistro
Molliter ille gradum glomeret: si lata patescunt
Iugera, & ingentes trepident calcaribus armi,
Vnà Eurumque, Notumque & nubifugos Aquilones
Antevolet, Caurosque leves post terga relinquat,
Sideraque, & pleno redeuntia flumina ponto.
Ille vel illaesae Cereris trans summa volaret
Culmina, vel lati tranet spatia invia Rheni,
Aut Vahalim, aut dubio fallentem gurgite Mosam.
Hoc in Amycleâ si quondam vectus arenâ
Tyndarides foret; haud proprijs bellator Aphidnis
Lurida Cecropio cecidisset victima bello.
Sunt alij, quorum Latij meminere poëtae;
Calaicus Lampon, & pulchro concolor albo
Astur Panchates, & nigra fronte Pelorus,
Et Tagus, & Pholoë, & cursu velocior Iris,
Aschetus, AEthion, Styrias, Phariusque Podarces,
Et quos Thebanis genitrix effuderat Herpe
Nobilis, & soboles Sicoris bellacis Ilerdae:
Vel, quem Troianum Mezentius urget in hostem,
Rhebus, & Adrasto celebris vocalis Arion;
| |
| |
Et gemini Mavortis equi, mensorque dierum
Cum rutilo Pyroente Phlegon, & fervidus AEthon,
Et Stygius Nycteus, & clari Xanthus Achillis,
Plutonisque notâ variè distinctus Alastor.
Hunc timeant cuncti, timeat concurrere soli
Quilibet. hic veteris laudes praestringere secli
Gestiat. hic docilu freni sessoribus aurem
Commodat, hic rectum servabit doctior axem,
Quàque voles, sinuabit iter. Tu scande superbos
Excellens Godefride thoros, & ephippia tanto
Turgescant supposta viro. non vilia noster
Pondera vectat equus. tellus, mare, sidera, coelum,
Nobilitas, virtus, domino portantur in uno.
Terrarum doctrina tua est: tibi regna locosque
Nosse datum: quantum Occiduus Sol distat ab ortu,
Belgicaque Aurorae thalamis, à Gadibus Arctos
Vtraque, Lappionumque solum. Tu vasta Deorum
Atria, flammantes aeternis ignibus orbes
Emensus radio, Solis Lunaeque labores,
Mercurij, Martisque vias, Veneremque, Iovemque,
Tardigradique senis lentos sublimior axes,
Et picturatam didicisti pervigil aethram.
Tu pelagi curvos flexis, Tiphynque Batavum
Expedias; tibi, quas docta depinxit arenâ
Dextra Syracusii senis, aut vis Attica, formas,
Ingenio famulans aperit labor. omnia pernox
Vidit, & ignavis animus succensuit horis.
Has portat phaleratus opes; haec baiulat AEthon
Sacra tuus, tantumque decus dum gestat in armis,
Altius insurgit quadrupes, dominique quod unum est,
Virtutis putat esse suae. Tu tergore in isto
| |
| |
Saepius aethereos, per amica silentia noctis,
Spectasti studiosus equos: ubi Pegasus alas
Explicet, & gelida depromat tela pharetra
Phillyrides: equitesque istos miratus & arma,
Vidisti, tibi quos servet natura penates,
Quam pandant tibi fata domum. quà praevius ivit
Insignis pietate pater; cui stemmata, sanguis,
Nec tanti fuit illustri spectata theatro
Gloria, quam patriae, & veterum custodia legum,
Et pacis venerandus amor, praelataque Marti
Tranquillae sors laeta togae: quà despicit orbem,
Qui nomen tibi scripsit, avus, laudabile Belgis
Nomen, & aeternae meritus praeconia famae.
Vive Heros; stimulosque tuis virtutibus adde,
Adde decus decori, subeant nascentia fratris
Incrementa tui, magni cui pondera belli
Dux Ligurum, atque suas partitur Spinola curas.
Quique mihi faciles aditus, & mollia fandi
Tempora concedis, nec vilia nomina spernis,
Accipe laudatum, sessor generose, caballum.
|
|
Auteursrechtvrij