Hoe dat heer Floris van Yselstein wert vanwegen die prince van Spangen ghehult voer een erfheer van Vrieslant te Leeuwerden.
Dat XLIII capitel.
Op dieselfde tijt in junio, anno XV C XV, worde heer Floris van Yselstein tot Leuwerden gehult vanwegen die prince van Spangen voer een erfheer; ende men werp gouden ende silveren ghelt onder tvolc, in gedenckenisse dat die rebellige Vriesen des eedts gedencken souden. Diesghelijck schiede oeck te Franiken, ende die regenten, vanwegen die vorst van Sassen, resigneerden die blochusen, ende gaven tlant in handen mijn heer van Yselsteyn als stathouder des prins. Des jaers daeran, anno XVI, den XIII dach in mey, voor die here van Yselstein van Enchusen met veel hoyen ende ander scepen, beset met II M knechten voer Worcum op die ree, ende wan aldaer mit geweldiger hant die Scotsebarck, die hullic ende ander oerlochsscepen, die gevangen worden, tot Enchusen gevoert ende gehangen, want men se hilt voer zeerovers, ende barnde, dat hi niet mit hem en mocht voeren. Lubbert Turc wert opten XXVI dach in mey gescict vanwegen den heer van Yselsteyn als overste hoeftman van die Coninclicke Majesteit van Spangen, mit M knechten tot Bolswert, om daer die rebelle Vriesen te verscriven, dat si souden comen ende doen den coninc enen behoorliken eedt, ende betalen die verscenen domeinen die si den coninc sculdich waren; waerop die van Bolswaert antwoerden dat si corts wouden comen, ende versameden in III dagen die Woutvriesen mit meer ander, ende II M knechten, daer die grave van Swartsenburch overste of was; ende quamen also voer Bolswert, om die coninc van Spangen een edt te doen, alsulcx, dat Lubbert Turc weec na Herlingen. Ende die grave mit die Vriesen togen voer dat blauwe huysken, dat heer Ottinge hoorde, daer die Bourgonsen op waren, ende wonnen dat, treckende mitter daet voer Leewerden, dat si beleyden. Si sloegen oec een leger tot Monikebay.
Auteursrechtelijk beschermd