Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die Gheldersen wonnen tblochuys te Tuyl ende versloegen veel Bossenaers, ende hoe here Floris van Yselstein wan den Roden Toorn, Peersic; ende hoe die here van Wassenaer gevangen⁴⁸⁶ wert int jaer van XIII.
Capitel XL.

Int jaer van XII dairna togen die Gheldersen uut Worichom over tys te Herdicxvelt omtrent Sinte Ponciaen ende versloegen veel volcx ende verbranden veel dorpen. Op Lichtmisavont⁴⁸⁷ wonnen die Ghelderscen, dair die grave van Serberen overste of was, tblochuys te Tuyl in den morgenstont. Op denselfden dach sijn die van tsHertogenbosse gecomen brandende ende rovende in die Bommelschewaert, dair tsegen is gecomen die voorscreven grave van Serberen mit Michel van Poemeren, ende sloegen ende vingender veel van dye Busschenaers. Die Busschenaers willende hoer leet wreken, sijn ghetogen voer Bommel, daer si niet veel en bedreven. Hierna reysde heer Floris int landt van Ghelre mit een hoop knechten ende weinich ruteren ende wonnen geweldelic den Roden Toorn, ende destrueerden die ende sloegent al doot datter op was. Des gelijc deden si Peersic ende daerna voer Hoemen, dat hi in genaden nam ende destrueert. Binnen X dagen daerna so wert Tiel weder Ghelders ende Boegraven wert verbrant. Int eynde van dit jaer quamen dye Ghelderschen voer Amsterdam mit XI C man, ende branden die scepen, ende deden grote scade, treckende die ene helft op die Bilt, dander helft bleef int cloester ten Carthuseren, buten Uutrecht. Die here van Wassenaer dit verhorende, versaemde sekere hooftluyden, als Casper van Olm, Hans Beck, Jonghe Jan van Delft ende Jan van der Eer, hebbende tsa-

486 gevagen AB.

487 avout AB.

[p. 431r]

men IIII C knechten, ende verdreef die Gheldersen uut dat Carthuser cloester voorscreven opten Heiligen Kersavont, in den avontstont, ende bleef daer selver in die Kersnacht. Dese verjaechde Ghelderssen versaemden hem mit die ander helft die op die Bilt lagen ende andere hulperen ende quamen opten Heyligen Kersdach smargens, ende vingen den here van Wassener mit veel van den sinen. In ditselve jaer viel Sinte Pieters toorne tot Leyden, hebbende in die hoechte XXXI ½ roden, ende viel binnen IX roden opten vijften dach in maerte, anno als boven. Daerna, int jaer van dertienen, stichten die Ghelderssen brant voor Schoenhoven. Jan van Delft dit siende, heeft hem hier tsegen ter weer geset, al was hi in minder getale dan si, so wert hi van dien verslagen. In dit jaer warender oec versceiden opinie onder die steden ende edelen des lants van Hollant of men mitten Ghelderschen van pays ofte bestant tracteren soude dan niet. Ten laetsten is bi mijn genadige vrou Margariet, dowayerse van Savoyen, macht hebbende van den keyser ende coninc Kaerle, ende doctoer Willem van Langen, gelike macht hebbende van den heer van Ghelre, een bestant gemaect van IIII jaren, ingaende na die publicacie van dien op Sinte Louweris dach anno voorseit, ende terminerende Laurenci Anno XVII, mit puncten ende articulen int bestant verclaert. Terwijl dat men over dit bestant tracterende was, sloegen die Gheldersen op Sinte Jacops dach die Dortsce Waert uut tot Alblas ende Alblasserdam, ende vingen veel mannen ende namen enen groten roef. Coninc Henric die VII, coninc van Engelant, hadde een actie tseghen den coninc van Francrijc, is mit grote macht van volke ende gereetscap van oerloge tot Calis overgecomen, die te hulpe ghecomen is keiser Maximiliaen van Romen mit vele Overlantsche heren. Ende si hebben mitten eersten gewonnen Terewaen, daerna Doernick. Die coninc van Scotlant menende Engelant onbewaert te vinden, is gecomen om dat te gewinnen, denwelken dye coninghinne van Engelant vromelic wederstont ende versloech hem. In dit jaer is onse conincs III suster gehijlict an den coninc van Hongarien, welken coninc die keyser Maximiliaen om een seker getal ducaten overgaf sijn actie die hi tot het conincrijc hadde met sijnre nichten. Die Franchoysen merckende die mogentheit des conincs van Engelant voorscreven, persuuadeerden denselfden coninc mit conterfeyte brieven dat die keisere wel ofstaen wilde thilic gesloten tusscen sinen neve, hertoge Kaerle, prince van Spangen, ende sine suster van Engelant, begerende daeromme dye te hebben tot een coninghinne van Francrijc. Die coninc van Engelant heeft dit geloeft ende heeft dit huwelic angenomen mit enen pays. Corts daerna, anno XIIII, starf coninc Lodewijc van Vrancrijc, ende des conincks van Enghelant suster is een wedue gheworden.