Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van dat Lubicse oerloge, ende hoe Oldenseel ingenomen ende weder gewonnen wert, mit het belegghe voer Yselstein ende meer gescienissen der jaren X ende XI.
Capitel XXXIX. B

Anno XV C ende X was toerloge tusschen den coninc van Denemarken ende die steden van Lubic, Wismar, Rostwijc ende Missond, etcetera. So hebben die van Lubec brieven gesonden in Hollant, Zeelant ende Vrieslant, waermede si den scipperen derselver landen bevolen ende verboden in Denemarken niet te comen, dwelc geweest soude hebben tot groot afterdeel derselver landen ende hem geensins en stont te doen; waeromme hebben die Lubicsen mit horen adherenten sonder te diffideren VIII grote scepen genomen voer Gripeswol: IIII van Hoorn, II van Enchusen ende II uut Waterlant. Twelc tlant van Hollandt seer displiceerde, waeromme die steden van Amsterdam, Hoorn, Enchusen, Edam, Monickendam, IIII oerloch scepen gesonden totten coninc voornoemt, omme daermede hoer scepen geveylicht te werden. Als nu die Hollantsce vloet rede was, sijn die Lubicsen mit hoer adherenten daeronder gecomen, ende hebben se verjaecht ende L maers scepen genomen, so Hollanders, Vriesen ende Campers. Mer hadden die Denen willich gheweest, si souden met die IIII Hollantsce oerlochs scepen den Lubicsen grote scade ghedaen hebben; mer die Denen en wilden niet. So sijn si des anderen dages daerna mit coepvaerders weder thuyswert geseylt. Int navolgende jaer van X sijn die Lubicsen mit der Hollanderen geroefde scepen, nadatter een bestant gemaect was, in Vlaenderen ende Zelant gecomen. Welke scepen die Hollanderen mitten waterrechte anspraken ende wonnen se weder. Int jaer XV C ende X heeftet mede belieft den here van Ghelre sine vrienden ende nageburen, die Overstichschen, willen beslasten, menende inne te nemen die stat van Campen mit knechten die uut Denemarcken gecomen waren, ende van hem angenomen die te Geelmuyden lagen omtrent II M. Van denwelken die overste gereyst zijn bi den here van Ghelre om artelrie ende ander instrumenten van oerlogen, ende sijn gecomen te Ens; ende worden aldaer van een Camperman verspiet, die te Campen verboetscapte dat hi scepen vol spietsen ende ander instrumenten gesien hadde; waeromme sijn die Campers uutgereyst ende vingen den oversten van dien mit XL ander knechten, dair die van Campen dese nabescreven personen of gerecht hebben: ten eersten Dirc van der Berch, Henric van Esse, Eylert die Vriese ende Luytgen van der Marck, ende meer ander, ende hebben se alle op raden geset. Die here van Ghelre heeft dit seer qualick genomen ende reysde mit dat volc ende meer andere sommige reysigers voer Deventer om die verrasschen ende hoer goet te benemen. Dwelc hi niet en mochte volbrengen om der burgeren cloecheit ende VI C studenten, die dat beletten. Vandaer reysde die here van Ghelre ende wan Diepnum, Goer ende Oldenzeel. Dwelc mijn heer van Uutrecht, biscop Frederick van Baden, mitten Overstichte nyet en stont te liden. Waeromme dat die biscop voorseyt Diepnum ende Goer van den Gheldersen weder stormenderhant ingenomen heeft, ende dede dairna veel scaden int graefscap van Zuthpen mit roven ende branden ende desgelijcken in die Velue, ende wan oec daerna opten Meydach stormenderhant Verwold, dwelc toebehoerde die here van Ghelre. Ende is vandaer ghereyst voer Oldenseel, hebbende den here

[p. 430v]

van Yselsteyn tot ritmeester, dat hem opgegeven wert na veel gedaen costen, nadat hi daer veel doden hadde ghehadt; ende wan oec daerna thuys te Keppel, dat hi verbrande, ende sijn van daer getogen doer tgraefscap van Zutphen tot Deventer, rovende ende brandende; ende zijn gereyst te Deventer over die brugge ende wonnen Niewekerck, ende branden die gehele Velue datter gebleven was. Na desen is een tractaet gemaect omtrent Martini int jaer voorseyt.

In ditselfde jaer seyde men dat die van Uutrecht, die horen here noch den Overyselschen int beleg voer Oldenzeel geen bystant en deden tsegen den here van Ghelre, etcetera, dat si subtijlicken overleyden enige manieren, want sijt met cracht niet doen en mochten; mit denwelken si listelic mit scouwen vol volcs ende met turf over gedect Yselstein souden becrachtigen, dat nochtans geen effect en sorteerde. Welke injurien here Floris an hem ende sine stede versocht seer ter herten nemende, ende is getogen met sommige knechten voer Utrecht, stichtende brant op Sinte Pontiaensdach. Cortelic hierna is Derwich over gevallen ende weder Ghelders ghewerden. Die van Uutrecht noch in meninge waren Yselstein te beleggen, maecten op die Vaert een blochuys. Corts hierna wert Bommel weder Ghelders. In desen tiden destrueerden die van Uutrecht Ninroe ende⁴⁸⁵ vingen Willem Turc. In dit voornoemde jaer togen die van Utrecht uut met den heer van Ghelre opten Paeschavont om Yselstein te beleggen, dwelck si deden; ende zijn van daer van den heer van Yselstein met sinen hulperen, die heren van der Oerden ende andere verjaecht, nadat sijt omtrent III maenden belegen hadden, ende sijn geweken binnen Montfoert. Tsanderen daechs tooch die here van Ghelder mitten sinen, die sommige binnen Uutrecht ende dandere in die voersteden; nadat die van Uutrecht hem weder gecolligeert hadden, leyden si te Jutphaes XVII C knechten; van desen XVII C is die here van Gheldere mit vier vaentgen knechten gereyst ende becrachten tlage huys te Beest ende verslogen Cornelis Piec met zijn gesellen, ende sijn vandaer getogen in hoer leger tot Jutphaes. Die here van Yselstein die is gecomen mit de here van Wassenaer met tweehondert paerden ende VI C voetknechten, ende hebben dye van Jutphaes veel gevangen, geslagen ende verdroncken tot Uutrecht an die poorten. Van desen oerloge is gemaect ende gesloten een pays. Ende voer dat tractaet leverde Phillips van Zemeren den here van Ghelre thuys te Hattem. In den herfst desselve jaers wert die stat van Venloe belegen ende Grebbevorst heeft dairna Worichom ingenomen.

485 ende ende AB.