Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Additien⁴⁸²

Het XXXVII capitel.

Hoe datter weder een oerloge opgheresen is tusschen hertoge Kaerle van Ghelre ende dese landen ende hoe die Franzoysen die van die van Namen ter neder getogen werden ende Boegraven gebrant wert.

Int jaer ons Heren XV C ende VII sijn gesonden sekere Franchoysen van dye hertoechinne van Bourbon, so men seyde, in Ghelrelant mit groter macht te Remonde, ende sijn van daer gereyst in Brabant mit die hertoech van Ghelre te Turnout, doende aldair grote scaden mit roven ende brantscatten, nemende veel vrouwen gevangen die si mede voerden ende hielden tot haer rantsoen betaelt was, ende hebben niet lange dairna in die maent van septembri die stat van Diest bevochten, menende die te gecrigen mit stormenderhant; dwelc hem miste, want die van Diest van als wel voorsien waren ende van horen heer, die grave van Nassouwen te wel bewaert, waerom si van daer togen ende verwoesten Halen ende beleiden dairna Thienen, twelc si wonnen stormender hant ende verloren daer een groot edel graef. Als si nu dese stat van Thienen kercken, cloesteren gespolieert hadden, dodende ende vangende veel luden op Sinte Michiels dach int jaer voorscreven, ende voeren die tot Remonde ende elders, daer si lange gevangen lagen, ruymden si die stede ende een ygelic is wedergekeert vandaen hi gecomen was. Die Franzoysen reysende doer tlant van Ludic, sijn gecomen int lant van Ardenne, om na Francrijke te reisen mit hoeren roef, ende vernachtende tot Sinte Hubrechts, menende aldaer vry ende sonder sorgen te sijn, maecten goet chyer ende ghingen slapen, want si moede gereist waren.

482 ontbreekt ABC; zie hoofdstuk 41.

[p. 429v]

Twelc verhorende enighe vrome Namoreusen coelgravers ende houthouders tot⁴⁸³ VI C toe, sijn gecomen in der nacht, met horen capitein Johan Despontijn, ende hebben der Franchoysen wake ingenomen, ende dandere, dye hem noch vrolic maecten ende sliepen, verslagen, verjaecht ende gevangen, dat si veel edelen vingen ende versloegen. Indyen die verslegen heren gerantsoent geweest waren, ende hoer rantsoen soude meer hebben bedragen dan die scade die si den Brabanderen gedaen hadden. Van welke victorie dye Namoreusen voorscreven, behalven den onsterfliken⁴⁸⁴ naem hoers vromicheits, vercreghen hebben een uutermaten sconen roof van paerden ende oec harnas, gout, silver, fluweel, syde, coppen, scalen ende veel ander costlicheit sonder ghetal, want sijt daer altemalen lieten ende berchden hoer lijf. In ditselfde jaer, op Sinte Augustijns avont, verbarnden die Gheldersen tdorp van Boedegraven, ghelegen in Hollant.

483 tot tot AB.

484 ontsterfliken AB.