Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den pays van Camerick ende van dat belegge voor thuys te Poroyen.
Dat XXXVIII capitel.

In ditselve jaer heft heer Jan van Egmont tot costen van den Hollanders ende den Busschenaers belegen dat starcke ende wel besorchde huys te Poroyen, daer capiteyn ende bewaerder of was Snewint, maerscalc des lants van Ghelre, ende was ghelegen op die Maes, die den coopluden geen cleyn viant en was. Welke huys die here van Ghelre ontsettede des sonnendaechs na die hoechtijt van Onser Liever Vrouwen gheboerte. Ende onder andere saken werdt in ditselfde jaer getracteert te Cameric bi den ambassaten van den keyser Maximiliaen ende van den coninc van Vrancrijc ende oec den coninck van Arrogon een pays tusschen dese onse landen ende den hertoge van Ghelre ende gesloten, die niet lange en duerde; want joncheer Florijs van Yselstein, bi consent der raden van minen ghenadigen here, enige luden omtrent Bommele geseten, gevangen ende gescat hadde, seggende dat si Bourgoens waren. Ende die here van Gelre seide dat si Ghelders waren, dwelc hem die here van Ghelre seer antoech, concluderende daeromme tbestant van Cameric bi die Bourgonsen ghebroken te wesen; ende leyde lagen den coopluden uut desen landen, die te Vranckevoert reysende waren, die hi bi Coelen ving, ende dede se te Ghelder voeren, die hi daer wredelick tracteerde ende swaerlic rantsoneerde. Ende corts hierna, int jaer XV C ende acht daeranvolgende, is het huys te Poroyen weder in dye meyemaent belegen geweest van die grave van Anholt, diet ten lesten na vele costen ende moyten tot sinen wille in ghenaden genomen heeft, sonder XII, dye hi daer hinck, Snewint doot sijnde. Welke Poroyen hi dede slechten ende ofbreken, so wel het huys als die walle. In desen tiden heeft die here van Ghelre belegen Harderwijc, dat Bourgoens was; mer hi en bedreef nyet. Vandaer is die vrome vorst van Anhout mede ghetoghen int belegghe voer Wesop, dat die Gheldersen mit het huys te Muyden in hadden. In welke belegge gecomen is ( ende was gesonnen van den coninc van Vrancrijc ( dye grave Carpensis uut Lomberdyen, die bi tractaet den keyser Maximiliaen, die gehult was als momber ende voecht deser landen, weder leverde Wesop ende Muden voorscreven, nadat die Gheldersen van dat blochuys te Aemsterdam verdreven waren op Sint Jans dach Nativitas, anno voorscreven, ende here Floris van dye Gheldersen te Muyerberchkerck gescoten ende veel Walen versleghen waren, daer die here van Embri capiteyn of was.