Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van enige scermutsingen tusschen den Bourgoenssen ende Ghelressen ende hoe dat een comeet openbaerde, ende andere teikenen voer den doot des conincs Philips van Castillien, ende hoe hi starf.
Dat XXXV capitel.

Die coninc van Castillien uut desen landen getrocken wesende, hebben die Ghelressen terstont weder rebelleert, makende actye van oerloghen op des conincs landen van Castillien, ende hebben hem vervordert sommige plecken, steden ende sloten weder in te nemen, boven die aliance ende den tractaet van payse gemaect⁴⁸⁰ op tslot van Rosendale, als voorseyt is, als die stede van Grol ende Wageningen ende andere plecken, daer si vele scaden uut gedaen hebben van roven, van barnen, pilgeren ende vangen opten Hollanders ende Brabanders. Die here van Chivers, stathouder generael van allen den landen, heeft groot volc van wapenen vergadert, ende is mit alle den hoop voer Wageningen getogen, ende beleide die stede sere vast; ende also binnen der stat vele vrome knechten lagen, quamen si dicwils uut scermutsen ende sloegen malcanderen veel volcs of. Ende als dye Bourgonssen saghen dat si nyet veel en bedreven ende op dye stede nyet winnen en mochten, toghen si wederom ende braken op van den belegge. Daerna, in Oestmaent, is die here van Yselstein ghetogen mit veel volcs tot Rawesway ghelegen over dye Lecke int lant van Ghelre, tusschen Wijck te Duersteden ende Culenburch, daer die Ghelressen een starc blochuys hadden doen opslaen, daer si veel quaets uut deden van roven ende branden in den landen van Hollant, ende hebben dit blochuys assaulleert ende bestormt, vreeslick daerop schyetende, dat si hem

480 ls gemaett AB.

[p. 428v]

int einde, van noots wegen, opgeven mosten; ende si vonden dair vele gevengen op uut desen landen, ende si braken terstont dat blochuys of ende slechtent neffens der aerden.

In den maent van augusto openbaerde een grysselijcke comeet in der lucht, dye sinen opganc nam in noortoest, ende ghinc so omme tot int noortwest, dair hi sinen onderganc hadde, hebbende sinen staert na dat weste. Ende daer ghinc een grote vierige vlamme van hem, die lanc ende breet was, ende ghinc meest opwerts, ende duerde omtrent XVIII daghen.

In dyeselve maent, omtrent Midoesten, was in den lande van Hollandt, tusschen den dorpen Beverwijc ende die Wijc opt Zee een arm wijfken wonende, ende was opt uuterste van kinde te baren. Ende als den tijt nakende was dat si baren soude, die vrucht, die si dragende was, heeft omtrent XIIII dagen lang binnen sijnder moeder lichaem noch sijnde besloten, alten deerlicken ende jammerlicken geluyt gegeven van screyen ende wenen, om dwelcke te experteren ende te horen vele eerbare mannen ende vrouwen gecomen sijn, ende hebben dat certificeert ende geseyt voer vele geleerde mannen, die dair suverlic op gescreven hebben; want nye desghelijcs gehoort of gesciet en was, prenosticerende ende verclarende die grote tribulacie, commocie ende destructie der landen van Hollant, overmits den beclageliken doot van sodanigen mogenden jongen prince.