Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die coninc van Castillien in Spangen reysde, ende hoe si overmits storm ende wint in Engelant quamen.
Dat XXXIIII capittel.

Nu valt te scriven van den tweesten reyse hertoge Philips, dat hi in Spangen reysde; dyewelke dat ordineerde ende maecte heer Willem van Croy, heer van Civers ende van Aerscot, zijn generael stathouder ende gonvernuer zijnre landen, ende beval zijnre susteren vrouwen Margriete Kaerle zijn soen, mit zijn susteren. Ende als de coninc van Francrijc dit vernam, dat hi doir Francrijc niet trecken en woude, mer te water, so sant hi zommige grote ambassaten tot hertoge Philips, als heer Philips van Cleve, graef van Nyvers ende den biscop van Parijs, versoekende in den eersten an hertoge Philips dat alsulken toecomenden huwelic, als ghesloten was tusschen heer Kaerl zijn soen ende vrouwe Glande, des conincs dochter, beyde jonge kinder, te nyete ghedaen soude worden, mitsdien dat enige princen in Francrijc ende oec van den Perlamente des niet te vreden en waren; mer si wouden dat de grave van Valoys ende Engolemme erfgenaem van der cronen van Francrijc hebben ende tot een wive nemen soude dye vrouwe Glaude; ten anderen versochten, dat si den coninc zijn jurisdictie hem volghen soude int civile in Vlaenderen ende in Artoys; ende in Artoys de appellacie int criminele, also dat van outs plach te wesen. Dwelc den coninc al geconsenteert wert. Dese dachvert voleindt ende al dinc bereyt wesende, is hertoge Philips, coninc van Castilgen mit zijnre vrouwe Johanne ende veel edelen, al meest jonc volc, in Zelant getogen int jare M V C VI, ende zijn des anderen dages na XIII dach tot Aremuden tscepe gegaen, des avonts te VII uren; ende des nachts te II uren worden de zeylen opgetoghen ende voeren van lande mit een

[p. 428r]

grote menichte van scepen. Ende onlancxs daerna is een groote tempeest ende storm opgeresen van winde, snee ende miste, dair si lange in groten perikele van alle hare liven op Gods gewout gezeylt hebben, niet wetende waer si waren, van ure te uren den doot verwachtende; wanttet int coutste van den winter was, dattet menich ewich mensche verwonderde dat hi hemselven soe avontuerde in sulken tijt tscepe te gaen. Mer God heeft gracie gegeven, dat si in een haven tot Weymuyen in Enghelant quamen, ende leyt in die westcontreye van Engelant, ende alle dander scepen waren vaneen versteken, deen hier, dander daer, sonder dat yemant van den anderen wiste; ende enige waren oec verdroncken.

Als die coninc Henric van Engelant dye VII dit verhoerde, heeft hi een scoen geselscap van edelen geordineert ende ghesonnen om den prince ende der princesse te ontfangen, ende heeft se sere feestelic, mit groter triumphen, inghehaelt, bewisende grote ere ende reverencie, scenckende oec grote ende costlijcke ghiften ende gaven, ende betalende alle sine costen, ende reet dagelics mit hem spelen om tlant te besien, ende dede hem hebben solaes ende vrolicheit mit heeren ende vrouwen, ende alle wes hi begeerde. Ende die coninc versochte sere naerstelic op hem, dat hi hem overleveren woude den grave van Suffolc uut Engelant dien hi gecregen hadde op thuys te Hattem, als voorseyt is, ende was op die tijt binnen der stede van Namen; ende men seyde dat hi stont na die crone van Engelant. Ende dieselve grave hadde noch enen broeder die oec vluchtich was uut Engelant. Aldus dan consenteerde hertoge Phillips dat men den grave van Suffolc halen soude uut die stede van Namen, sonder te misdoen an den live. Ende hi wert te Namen gehaelt ende den Engelsen gelevert ende in vangenissen⁴⁷⁹ geleit, dat vele menschen mishagede. Ende die coninc van Castillien is in Engelant gebleven totten XXIIII dach in maerte, ende heeft oerlof an den coninc van Engelant ende sijnre coninghinne ende an al den heren genomen, ende is weder na zijn schip ghereyst om enen goeden wint te wachten in Spangen te zeylen. Ende op Sinte Marcusavont ghingen si weder tzeyl ende sijn mit enen geluckigen winde in Spangen gecomen, ende quamen in die haven van der Crongen, ende togen doe voert tot Compostellen in Galissien ende versochten den groten heer ende heiligen apostel Sint Jacob, danckende ende lovende God dat si uut sulken uutnemende groten perikel verlost ende gecomen waren, ende is voirt gereyst in Spangen, ende wert daer van vele wel ontfangen.

479 aldus B; vangenisseu A.