Hoe dat den pays ghemaect wert tusschen den Bourgonsen ende Ghelressen.
Dat XXXIII capitel.
Als dye stadt van Aerhem ende meer andere steden in handen des conincs van Castillien hem ghegheven hadden, soe bleef dye coninck noch buten der stadt legghen op tslot te Rosendale. Soe waren op die tijt int heer ghecomen dye biscop van Uutrecht ende dye heer van Montfoirde; dese ende meer andere tracteerden seer naerstelick tusschen den coninck ende den hertoghe van Ghelre. Ende wert soe verde ghebrocht dat die hertoghe mit sekere personen ghecomen is in presencye des conincxs, ende viel hem te voeten; ende die coninck nam hem terstont minlicken op van der aerden, ende ghinghen te samen op tslot van Rosendale, dair si langhe tijt byeen waren. Ende also die coninc ende zommighe sijnre raetsluden begheerlyc waren te reysen in Spangen, soe wert dair gheseyt dat elck behouden soude dat hi gewonnen ende in hadde. Ende die hertoge van Ghelre soude op des conincs cost mit hem in Spangen trecken. Mer nadat die hertoghe int hof gheweest hadde, so wert hi also gesint niet mede te reysen, hem excuserende, etcetera. Ende om dese reyse in Spangen te doen, so behoefde men veel ghelts ende goets; al hadde hy veel beden ende scattinghen ghehadt, hi most noch al meer hebben. Soe dede hy die Staten van den landen vergaderen, ende hem worden consenteert te vercopen van sinen demeynen ende heerlicheden, dwelck hem dwaselic admitteert ende toeghelaten worde van den landen van Brabant, Henegouwen, Hollant ende Zeelant; mer die Vlamingen waren wiser ende en wouden niet consenteren noch toelaten, ende hadden also veel dancs ende ere als dander landen.
In dit jaer wert dat bosch ende wildernisse van Heemstede alheel vercoft mitten gront, bi consent der Raetsluden van Hollant.
Auteursrechtelijk beschermd