Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat de Gelressen anslagen maecten om die stat van Wezop te winnen ende dye stat van Uutrecht.
Dat XXX capitel.

Omtrent dese tijt sant die Roomsce Coninc een groot edelman uut Hoech-Duytslant, genoemt die grave van Anholt, mit XV C man te pairde ende te voet int lant van Gelre. Ende heeft zijn leger genomen ende gemaect voir die stat van Bommel in een reguliers cloester, dwelc si al vast ende starck bebolwerct hebben, ende deden daeruut grote scade int lant van Gelre, van roven, branden, ende namen grote brantscattingen in Tijelre Waert ende Bommmelre Wairt ende dair omtrent. Ende hebben dat grote, machtighe dorp van Drijel uutgeslagen, berooft, gebrant ende seer destrueert ende meer ander plecken. Ende op dese tijt lach binnen Naerden als capiteinen van tlant van Goylant joncheer Robrecht⁴⁷⁷ van Arenberch, ende dede oec vele scaden int lant van Gelre van roven ende branden op die Velue ende anders. Int jaer van XV C ende V, int beginsel, waren die Gelressen gecomen tot Hilfersom in Goylant ende staken dat vier int dorp; mer alsoe si al hoir goet ghevlucht hadden ende dye mannen wech gelopen waren, so en bedreven si niet van vangen ende roven

477 Robrechet AB.

[p. 426v]

dat yet waerts was. Op dese tijt lach dye hertoge van Gelre buten dye stat van Uutrecht op die Bilt, ende had omtrent II M knechten bi hem; so waren enige burgers binnen der stat die goet Gelres waren, ende hadden al heimlic mitten hertoge spraec gehouden om die stat van Uutrecht mit verraet ende subtijlheit te becrachtigen, ende hadden een anslach gemaect ende begrepen, als dat si zommige scouwen hadden doen maken mit lose bomen; onder ende boven waren si gevolt mit turf, ende souden aldus dese scouwen mitten turf binnen dye stat ter marct gebrocht hebben; ende alst tijt geweest had, souden si uutgetreden hebben, mit diegeen de hier of wisten, ende souden die poorten van binnen opgeslegen hebben, om den hertoge in te laten; mer dit verraet quam uut, dat die reyse te nyete ging, ende die burgers, die van desen opsette wisten, ruymden die stat. Dese winter, int jaer van XV C V, was mit allen sacht, sonder enige vorst; mer omtrent sinte Pouwels dach begant te vriesen, so seer ende so hart, dat men mit sleden over ijs liep, wair men wesen woude; wairom dat men in Hollant in groter vresen was voir de Gelressen, ende men hilt in allen steden scarpe wake; ende desgelijcs in den dorpen, als si enige quade tidinge hadden van den vianden, vierden si malcander toe ende sloegen die clocken om malcander te wairscuwen; so ist geboirt opten IIII dach van februario, ende was opten rechten Vastenavont, datter tidinghe in allen plecken van Noort-Hollant ende in Rijnlant quam, dat de Gelressen op die been waren om een sproncreise te doen; ende had groot volc van wapenen bi hem. Terstont werden boden overal uutgesonnen om die wairheit te vernemen wair dat hi hene getrocken was, want elc sorchde dat hem toe comen soude; ende bisonder die van Leyden, die in groter vresen waren. Ende also men overal snellic mit sleden lopen mocht over ijs, so vernam men in der wairheit dat si getogen waren na de stat van Weesp, ende die mit subtijlheit inne te nemen, ende thadde hem gemist, ende lagen voir een cleyn slootken, genoemt Uutermeer, gelegen buten Wesop. Ende als men dit in der wairheit vernomen had, maect men grote vergaderinge in Hollant ende in Waterlant om dese Gelresse te bevechten. De Gelressen dit vernemende, ruymden terstont dat velt, want se tot allen canten, overmits den ijse, bevechten mochte, ende dat si oec geen M starc en waren; ende staken dat bouhuys van dat sloetken an brande, ende togen weder na tSticht toe. Ende des ander dages begannet te doyen, dat si te vrier in Hollant saten; ende anders bedreven si niet dat scrivens wairt is.